Bılik barshaǵa birdeı mánge ıe bolýy tıis - Qyzylorda oblystyq máslıhatynyń hatshysy

QYZYLORDA. QazAqparat - Endigi ýaqytta táýelsizdigimizdi nyǵaıtyp, memleketimizdi myǵymdaýdyń jańa kezeńi kútip tur. Sondyqtan da, Memleket basshysy bes ınstıtýttyq reformany jarııa etkeni bárimizge belgili. Bul kezeńde bılik tarmaqtarynyń atqarar mindetterine ózgeris engizý qajettiligin ómirdiń ózi alǵa tartýda. Óıtkeni bıliktiń basty mindeti - qoǵam, memleket pen jeke adamnyń múddeleriniń tepe-teńdigin qamtamasyz etý bolyp tabylady. Qyzylorda oblystyq máslıhat hatshysy Baıqadamov Naýryzbaı osylaı deıdi.

«Jalpy  ekonomıkalyq reformalar men saıası reformalardyń  arasyn tym alshaqtatýǵa bolmaıtynyn moıyndaǵanymyz jón. «Aldymen ekonomıka» ustanymy óziniń ómirsheńdigin dáleldedi. Sonyń nátıjesinde halyqtyń ál-aýqaty ósip, ekonomıka turaqtaldy. Endigi jerde bılik júıesi tuıyqtalǵan saıyn ishki turaqtylyǵymyzǵa syna qaǵýǵa daıyn turatyndar bar ekenin de umytpaǵanymyz durys. Konstıtýtsııaǵa sáıkes, halyqty bılikke paıymdy aralastyra almaýdy búgingi tehnologııa ýaqyty keshirmeýi yqtımal. Olaı bolsa, Prezıdenttiń basqarý júıesin saqtaı otyryp, Prezıdent, Parlament, Úkimet jáne ózge organdar arasyndaǵy ózara qarym-qatynasty búgingi qoǵam úrdisine sáıkestendirýdiń ýaqyty keldi», - dedi N. Baıqadamov.

Onyń aıtýynsha, Prezıdenttiń birqatar ókilettigin Parlament pen Úkimetke, onyń ishinde memlekettik  baǵdarlamalardy  bekitýdi Úkimettiń quzyryna jatqyzý arqyly olardyń el aldyndaǵy jaýapkershiligin arttyramyz. Óıtkeni, osy ýaqytqa deıingi Prezıdenttiń kúshti bıligi, ekinshi jaǵynan, onyń kóterer mindetin de aýyrlatty. Úkimettiń keıbir sátsiz reformalarynyń da jaýapkershiligin Prezıdenttiń ózine kóterýge týra keldi.

«Úkimettegi kadrlyq ózgerister men jańa basqarý organdaryn qurýǵa ókildi bıliktiń tikeleı aralasýy demokratııalyq prıntsıpterdiń nyǵaıa túsýine múmkindik beredi. Bul bir jaǵynan jergilikti memlekettik jáne ózin-ózi basqarý júıesine de serpilis jasap, halyq bıliginiń negizgi formasy bolyp tabylatyn - máslıhattar men jergilikti ózin-ózi basqarý organdarynyń  rolin arttyrady dep senemiz. Elbasy usynysymen bastalǵan memlekettik bılik tarmaqtaryndaǵy ózara ókilettilikti qaıta bólý der kezinde qolǵa alyndy túsinemiz jáne ol el damýyna ózindik mańyz beredi dep kútemiz», - dep atap ótti Naýryzbaı Baıqadamov.