Bıletsiz jolaýshyny mingizgen Shymkent-Astana poıyzynyń bastyǵy men jolserik jumystan shyǵaryldy
ASTANA. KAZINFORM – QTJ-da bıletsiz jolaýshylardy tasymaldaý jáne jol júrý qujattaryn zańsyz satý faktilerine nóldik tózimdilik saıasaty iske asyrylýda.
Kompanııada júıeli jumys júrgizilýde, jurtshylyq pen buqaralyq aqparat quraldary ókilderin tarta otyryp, turaqty ishki tekserýler men jeke tekserister bastaldy. Osyndaı jaǵdaılardyń biri Almaty-2 temirjol vokzalynda bıletterdi zańsyz qaıta satýdy jáne jasandy tapshylyqty anyqtaǵan qyzmettik tekseris boldy.
«Sondaı-aq, Shymkent stantsııasyndaǵy tekserýlerdiń birinde bıletsiz jolaýshyny tasymaldaý faktisi anyqtaldy. „Shymkent — Astana“ poıyzynyń jolserikteri resmı satyp almaǵan bıletsiz adamdy belgili bir somaǵa alyp júrýge kelisken.
Qyzmettik tergeý qorytyndysy boıynsha poıyz bastyǵy men jolserik jumystan shyǵaryldy, al ekinshi jolserik pen Shymkent stantsııasy ýchaskesi bastyǵynyń orynbasaryna qatań sógis berildi», — dep málimdedi QTJ-dan.
Belgili bolǵandaı, ishki tekserýler eldiń barlyq vokzaldarynda ótýde.
Ulttyq tasymaldaýshy azamattardy @jolaushylar_tasymaly (direct) paraqshasyna nemese +7 776 714 5686 nómirine foto, aýdıo, beınematerıaldar usyna otyryp, jolaýshylardy bıletsiz tasymaldaý jáne bıletterdi zańsyz qaıta satý faktileri týraly habarlaýǵa shaqyrady.
