Bıletsiz balalardy avtobýstan májbúrlep túsirgender jaýapqa tartylady

ASTANA. KAZINFORM – Jańa zań jobasy aıasynda avtobýs aqysyn tólemegen 16 jasqa deıin balalardy qoǵamdyq kólikten májbúrlep túsirgeni úshin jaýapkershilik qarastyrylýda. Bul týraly Іshki ister mınıstrliginiń resmı ókili Shyńǵys Alekeshev málim etti. 

Іshki ister mınıstrliginiń aptalyq baspasóz máslıhatynda «Jańa zań jobasynda 16 jasqa deıingi balalardy qoǵamdyq kólikten májbúrlep shyǵaryp jibergeni úshin jaýapkershilik qarastyrylýda. Bul óz kezeginde bıletsiz jolaýshylardyń kóbeıýine alyp kelmeı me?» degen saýal qoıyldy. 

«Bul norma aldymen balalardyń qaýipsizdigi úshin qarastyrylyp otyr. Meniń oıymsha, atalǵan shara bıletsiz júretin jolaýshylardyń sanyn kóbeıtýge jol bermeıdi. Qoǵamdyq kólik júrgizýshisi nemese kondýktor polıtseıler men qamqorshylyq qorǵaý organdary ókilderin shaqyrady, sodan keıin balanyń avtobýsta bıletsiz júrý sebebi anyqtalady. Sebepti anyqtaý barysynda ata-anasynyń kinási belgili bolsa, ıaǵnı balasynyń qoǵamdyq kólik aqysyn tóleýin qamtamasyz etpese, onda ata-anaǵa jaýapkershilik qaralýy múmkin», - dep jaýap berdi Shyńǵys Alekeshev vedomstvoda ótken baspasóz máslıhatynda.