Bıletsiz jolaýshylardy tasymaldaǵan 8 poezd bastyǵy jumystan qýyldy
ASTANA. QazAqparat - 2018 jyldyń 9 aıynyń qorytyndysy boıynsha «Jolaýshylar tasymaly» AQ-nyń laýazymdy qyzmetkerleri sapar barysyndaǵy 7 myńǵa tarta poıyzdy teksergen. Bul týraly QazAqparat tilshisi «Qazaqstan temir joly» ulttyq kompanııasy» AQ basqarma basshysynyń keńesshisi Rýslan Imanqulovqa silteme jasap habarlaıdy.
7 myńǵa tarta tekserý jumysynyń qorytyndysy boıynsha 400 jaǵdaıda jolaýshylardyń bıletsiz júrgizý faktisi tirkelip, tasymaldaý, qyzmet kórsetý standartynyń jáne vagondardyń ekıpırovkasy erejeleriniń buzylýyna qatysty 3 myń hattama toltyrylǵan.
«Mundaı jaǵdaılardy anyqtaý jáne eskertý eń aldymen - bizdiń múddemiz. Kompanııanyń mundaı buzýshylyqtarǵa jol bergen qyzmetkerleri qatal jazalanady. Olar tártiptik jazadan bastap jumysynan da aıyrylyp qalýy múmkin. Máselen, 2018 jyldyń 8 aıynyń ishinde 145 qyzmetker ákimshilik jaýapkershilikke tartylsa, 63 adammen eńbek sharty buzylǵan. Naqtyraq aıtqanda, eńbek shartyn buzý jaǵdaıyna 8 poıyz bastyǵy tap bolsa, 10 poıyz bastyǵynyń laýazymy tómendetilgen», - dep habarlaıdy Rýslan Imanqulov.
Sonymen qatar, tekserý qorytyndysyna sáıkes kompanııanyń merdigerlerine aıyppul sanktsııalary salynǵan. Máselen, vagondardyń tazartylýy men jýylýy qyzmetine jaýapty merdigerlerge 3 mln teńge aıyppul, tósek-oryn jabdyǵyna jaýapty merdigerleri 8 mln teńge aıyppul arqalaǵan.
Kóliktegi ІІD qyzmetkerlerimen birge turaqty túrde iri temir jol vokzaldarynda reıdter júrgizilip turady. Qyzmetkerler bıletterdi qaıta satý jaǵdaılarynyń jolyn kesip, 9 aıdyń ishinde 31 adamdy ákimshilik jaýapkershilikke tartqan.
