Bılet quny 18 myń teńge. Qazaqstanda týrıstik áýe marshrýttaryn sýbsıdııalaý jalǵasady

ASTANA. KAZINFORM — Qazaqstanda áleýmettik mańyzy bar jáne týrıstik áýe marshrýttaryn sýbsıdııalaý jalǵasady. Osylaısha, halyqqa qoljetimdi áýe qatynasy uıymdastyrylmaq.

Әуе билеті
Фото: trvl.click

Buǵan deıin Katonqaraǵaı, Zaısan jáne Kendirli kýrorttyq aımaqtarynda óńirlik shaǵyn avıatsııaǵa arnalǵan jańa áýejaılar salynatyny habarlanǵan edi.

Úsh áýejaıdaǵy ushý-qoný jolaǵynyń parametrleri — 2 200×35 m, jobalardyń jalpy quny — 117,7 mlrd teńge. Bul áýejaılarda ATR-72, Q-400 Bombardier sııaqty 74 orynǵa deıingi óńirlik ushaqtardy paıdalaný josparlanýda. Atalǵan ushaqtar Ónerkásipti damytý qorynyń mehanızmderi arqyly satyp alynady.

Basty mindet — Almaty, Astana jáne basqa da iri qalalardan osy áýejaılarǵa tikeleı, halyqqa qoljetimdi áýe qatynasyn uıymdastyrý.

— Jyl saıyn 26 áleýmettik mańyzy bar áýe baǵytyn sýbsıdııalaý arqyly kólik qatynasynyń qoljetimdiligi artýda. Ásirese Úsharal, Úrjar, Túrkistan, Aqtaý, Kókshetaý, Balqash sııaqty týrıstik baǵyttarǵa erekshe nazar aýdarylady. Úsharal, Úrjar jáne Balqash áýejaılaryndaǵy shaǵyn avıatsııa termınaldary men aerodromdaryn jóndeý jumystary aıaqtaldy, — dedi T. Lastaev Úkimettiń búgingi otyrysynda.

Spıkerdiń aıtýynsha, bıletterdiń ortasha quny 18 myń teńge bolatyn 12 týrıstik áýe baǵytyn sýbsıdııalaý jalǵasady.

Sondaı-aq, byltyr 10 áýejaıda qurylys jáne jóndeý jumystary júrgizilgen. 350 mlrd teńge jeke ınvestıtsııa tartý esebinen Almaty, Shymkent jáne Qyzylorda qalalarynda úsh jańa jolaýshylar termınaly jańartyldy. Bul olardyń ótkizý qabiletin 6,5 esege arttyrýǵa múmkindik berdi (jylyna 3,5 mıllıonnan 23 mıllıon jolaýshyǵa deıin).

Bes áýejaıda, onyń ishinde Astana, Aqtóbe, Shymkent, Qaraǵandy jáne Jezqazǵan áýejaılarynda ushý-qoný jolaqtaryna jóndeý jumystary júrgizildi. Aqtaý jáne Pavlodar áýejaılarynda kúrdeli jóndeý jumystary bıyl aıaqtalady.

Aıta keteıik, ótken jyly qazaqstandyq áýe kompanııalar 15 mln-ǵa jýyq jolaýshy tasymaldaǵan.

Al áýe reısteriniń keshigýin azaıtý úshin jańa ushaqtar satyp alý josparlanýda.

Сейчас читают