Bıleti bar, biraq oryn joq: jolaýshylardy tasymaldaý erejesin buzǵandarǵa aıyppul salynady

ASTANA. KAZINFORM — Qabyldanǵan sharalar áýe kompanııalarynyń qyzmetin baqylaýdy kúsheıtip, jolaýshylardyń quqyqtaryn qorǵaýǵa, bılet normasynan artyq satylym saldarynan ushaqqa otyrǵyzýdan bas tartý jaǵdaılaryn joıýǵa múmkindik beredi. 

«Overbýkıng» — áýe kemesindegi oryndar sanynan artyq bılet satý tájirıbesi — kóptegen elde jıi qoldanylady. Іri halyqaralyq áýe kompanııalary keı jolaýshylardyń reıske kelmeıtinin boljap, orynnan artyq bılet satady. Alaıda barlyq jolaýshy ushýǵa kelgen jaǵdaıda, keıbireýine ushaqqa otyrýǵa ruqsat berilmeı jatady.

Sońǵy eki jylda Qazaqstanda da bul tájirıbe keıbir áýe tasymaldaýshylary tarapynan, ásirese tanymal baǵyttarda, mereke jáne demalys kúnderi qoldanylǵan. Jolaýshylar qolynda satyp alǵan bıleti bola tura, ushaqqa otyrǵyzylmaı, balama jol izdeýge májbúr bolǵan. Qoǵam narazylyǵy artyp, máseleni shuǵyl sheshý qajet boldy.

Aıta ketý kerek, bılet bolǵanymen, borttaǵy oryn berilmegen jaǵdaıda jaýapkershilik tek halyqaralyq reısterge ǵana qoldanylatyn.

Prokýratýranyń usynysy boıynsha Parlament Májilisi Ákimshilik quqyq buzý týraly kodekske ózgerister engizý máselesin qarap, jaýapkershilikti ishki reısterge de qoldanýdy maquldady.

— Endi ishki reısterde jolaýshylardy, bagaj ben júkterdi tasymaldaý erejelerin buzǵany úshin ákimshilik jaýapkershilik kózdelgen. Jańa normaǵa sáıkes, áýe tasymaldaýshy 50 AEK mólsherinde aıyppul tóleýi múmkin, — delingen Bas kólik prokýratýrasy habarlamasynda.

Aıta ketelik Qazaqstannan qaı elderge tikeleı áýe reısteri bar ekeni týraly jazǵan edik.