Bılet baǵasy kúrt tómendedi: eýropalyqtar AQSh-qa barýdan bas tartyp jatyr
ASTANA. KAZINFORM — Eýropadan AQSh-qa ushatyn áýe bıletteriniń baǵasy pandemııa kezinen beri bolmaǵan deńgeıge deıin tómendedi, dep habarlaıdy AZƏRTAC.
Bul Batys Eýropadan AQSh-qa saparlardyń aıtarlyqtaı azaıýymen baılanysty. Sarapshylar bul tómendeý kem degende shilde aıyna deıin jalǵasady dep boljanyp otyr.
AQSh Saýda mınıstrligine qarasty Ulttyq saıahat jáne týrızm basqarmasynyń aldyn ala derekterine sáıkes, 2024 jyldyń mamyrynda AQSh-qa shetelden kelýshilerdiń sany ótken jylmen salystyrǵanda 2,8 paıyzǵa azaıǵan. Batys Eýropadan kelgen týrıster sany mamyrda 4,4 paıyzǵa kemigen.
OAG Aviation analıtıkalyq kompanııasynyń derekterine súıensek, bolashaqqa arnalǵan boljamdar AQSh-qa keletin reısterge degen suranystyń turaqty túrde azaıatynyn kórsetip otyr. Shilde aıyndaǵy sheteldik reısterge jasalǵan brondar ótken jyldyń sáıkes kezeńimen salystyrǵanda 13 paıyzǵa azaıǵan.
Transatlantıkalyq áýe saparlary birinshi toqsannan bastap azaıa bastady. Bul AQSh bıliginiń jahandyq saýda soǵysyn bastap, mıgratsııalyq saıasatty qatańdatýynan keıin eýropalyqtardyń AQSh-qa saparlaryna qaıta qaraýymen baılanysty. Sonymen qatar, dollar baǵamynyń kúsheıýi de keıbir týrısterdi shetelge shyǵýdan tejegen.
Cirium kompanııasynyń taldaýyna sáıkes, 2024 jyldyń birinshi toqsanynda AQSh pen Eýropa arasyndaǵy 50-den astam baǵyt boıynsha ekonom-klass bıletteriniń ortasha baǵasy ótken jylmen salystyrǵanda 7 paıyzǵa arzandaǵan. Atlanta (Djordjııa shtaty) men London arasyndaǵy reıster tarıfi 55 paıyzǵa tómendegen.
Saıahattardy brondaýǵa arnalǵan Hopper qosymshasy jazǵy maýsymda AQSh pen Eýropa arasyndaǵy eki jaqty reıster bıletteriniń baǵasy byltyrǵyǵa qaraǵanda 10 paıyzǵa azaıǵanyn habarlaıdy. Ortasha bılet baǵasy 817 dollar bolyp, 2019 jylǵy pandemııaǵa deıingi deńgeımen teńesti.
Amerıkalyq tutynýshylar tıimdi usynystardy izdep, sapar kúni jaqyndaǵansha sheshim qabyldaýdy keıinge qaldyrǵandyqtan, Eýropa tarapynan suranystyń azaıýy saıahattardyń arzandaýyna qosymsha áser etip jatyr.
Aıta ketelik kongresmender Tramptyń Izraıl-Iran qaqtyǵysyna aralasý ókilettigin shekteýge tyrysyp otyr.