Bıler keńesi týraly ereje qabyldandy
BQO-da bıler keńesin qurý jónindegi jumystardyń úılestirýshisi, oblystyq sottyń sýdıasy Esenbaı Boranbaevtyń aıtýynsha, bul rette Elbasy N.Á.Nazarbaevtyń «Bolashaqqa baǵdar: rýhanı jańǵyrý» jáne «Uly dalanyń jeti qyry» baǵdarlamalarynyń negizgi qaǵıdalary basshylyqqa alyndy.
QR Joǵarǵy sotynyń «Tatýlasý: sotqa deıin jáne sotta» jobasyn júzege asyrý maqsatynda jáne BQO soty men BQO ákimi arasyndaǵy ózara yntymaqtastyq týraly 2016 jylǵy 22 sáýirdegi memorandým negizinde Batys Qazaqstan oblysynyń sýdıalar qaýymdastyǵy bıler keńesi týraly ereje jobasyn daıyndaǵan bolatyn.
Osy ereje jobasy Batys Qazaqstan oblysynyń ákiminiń 2019 jylǵy 11 qańtardaǵy №4 sheshimimen maquldandy.
Erejege sáıkes bıler keńesi «Rýhanı jańǵyrý» aıasynda ulttyq kod retinde qazaqtyń bıleriniń dástúrin jańǵyrtý, qoǵamdaǵy birlik pen yntymaqtyqty nasıhattaý, daýlasýshylyq deńgeıin tómendetý, quqyq buzýshylyqqa tózbeýshilik pen onyń aldyn alý máseleleri boıynsha, salt, ǵuryp, ozyq dástúrlerdi saqtaý jónindegi aýyldyq, aýdandyq, qalalyq ákim janyndaǵy keńesshi organ bolyp tabylady.
Erejemen bıler keńesiniń negizgi mindetteri, qurý tártibi, bıler keńesiniń qyzmetin uıymdastyrý jáne qyzmetiniń toqtatylýy týraly máseleler rettelgen.
2019 jyldyń 1 qańtaryna deıin oblystaǵy 12 aýdannyń 10-yndaǵy 95 aýyldyq okrýgte bıler keńesteri qurylyp, naqty iske kirisip, óz jumystaryn atqarýda. Qurylǵan bıler keńesiniń aralasýymen ótken jyly 14 daý qaralyp, sheshimin tapty. Bekitilgen ereje bıler keńesiniń jumystaryn jandandyrýǵa jańa serpin beredi.
«Bul ereje Qazaqstanda tuńǵysh ret qabyldanyp otyr», dedi QazAqparat tilshisine Esenbaı Boranbaev.
Eske sala keteıik, budan buryn BQO-da bıler keńesteriniń qurylyp jatqany jóninde jazǵan bolatynbyz.
