Bıle, jastyq: Aqmola oblysynda 15 horeografııalyq ujym saıysty

KÓKShETAÝ. QazAqparat - Atbasar qalasynda «Rýhanı qazyna-2021» respýblıkalyq festıvaliniń «Qazaqstannyń mádenı astanasy» is-sharalar jospary jáne «Dala folklory men mýzykasynyń myń jyly» jobasy sheńberinde Qazaqstan Respýblıkasy Táýelsizdiginiń 30 jyldyǵyna arnalǵan «Bıle, jastyq!» oblystyq baıqaýy ótti, úzdikter marapattaldy, dep habarlaıdy QazAqparat tilshisi.

Aqmola oblystyq mádenıet, arhıvter men qujattamalar basqarmasynyń qoldaýymen oblystyq halyq shyǵarmashylyq jáne mádenı demalys ortalyǵy uıymdastyrǵan baıqaýdyń maqsaty shyǵarmashylyq baılanysty damytý, kórkemónerpazdar ujymdary jetekshileriniń kásibı deńgeıin arttyrý, tájirıbe almasý jáne horeografııalyq ónerdiń barlyq janrlaryn tanymal etý.

«Óner dodasyna Aqmola oblysynyń aýdandary men qalalarynan 15 kórkemónerpaz horeografııalyq ujym qatysty. Saıystyń birinshi týry – onlaın, ekinshisi oflaın formatta ótti», - dedi Aqmola oblystyq mádenıet, arhıvter men qujattamalar basqarmasynan.

Baıqaýda horeografııalyq ujymdar halyq bıi jáne óz qalaýy boıynsha bir bı tárizdi eki kompozıtsııadan turatyn baǵdarlama usyndy.

Úzdik horeografııalyq ujymdardyń óneri gala-kontsert baǵdarlamasyna engizildi.

Baıqaý qorytyndysy boıynsha Kókshetaý qalasynan kelgen «Asyl mura» halyqtyq horeografııalyq ujymy Bas júlde ıegeri atansa, júldeli birinshi oryndy Qorǵaljyn aýdanynan kelgen «Qazyna» bı ujymy ıelendi.

Ekinshi orynǵa atbasarlyq «Molodost» halyqtyq bı ansambli jáne úshinshi orynǵa býrabaılyq «Oqjetpes» bı ujymy laıyq dep tanyldy.

Al, Atbasar aýdanynyń «Rodnıchok» halyqtyq bı ansambli arnaıy júldemen marapattaldy.

Jeńimpazdarǵa dıplomdar men baǵaly syılyqtar tabystaldy.