Bıik taýda qor jáshikteri paıda boldy: ishinde ne bar
ASTANA. KAZINFORM — Bıik taýly aımaqtardaǵy TJM «Qazseldenqorǵaý» MM baqylaý beketteriniń jańa modýldik ǵımarattaryna týrısterge arnalǵan arnaıy avarııalyq qor jáshikteri ornatyla bastady. Bul týraly TJM málim etti.
Úsh tilde belgilengen jáshikter taýda baǵdarynan adasyp, TJM baqylaý beketine kelgen adamdarǵa arnalǵan.
— Avarııalyq qor adamdy ýaqytsha qajetti resýrstarmen qamtamasyz etýge eseptelgen. Onyń quramynda 10 lıtr aýyz sý, bir býma otyn, dári qobdıshasy, eki táýliktik tamaqtaný ratsıony, sondaı-aq azyq-túliktiń birneshe túri bar. Olardyń qatarynda úsh túrli botqa, eki túrli buqtyrylǵan et, keptirilgen nan jáne tuz bar. Sonymen qatar jáshikterde sirińke men konservi ashqysh qarastyrylǵan, — dep túsindirdi mınıstrlikten.
Mundaı avarııalyq qorlardy jasaý bıik taýly aımaqtardaǵy qaýipsizdikti qamtamasyz etýge baǵyttalǵan qosymsha shara. Kútpegen jaǵdaı týyndaǵan kezde týrıst kómek kelgenge nemese jaqyndarymen baılanys qalpyna kelgenge deıin qajetti azyq-túlik, sý jáne jylyný quraldaryn paıdalana alady.
Aıta keteıik, buǵan deıin Almaty oblysyndaǵy Tómengi Kólsaı kólinde jańa ámbebap qutqarý pýnktteri ashylǵan bolatyn.
