Bıylǵy jaz ádettegiden ystyq bolady – Premer-Mınıstr órtten qorǵaý jumystaryn synǵa aldy
ASTANA. KAZINFORM – Ótken jyly 116 myń gektardan astam orman qory órtenip ketti. Bıyl da aptap ystyq pen qurǵaqshylyq boljanyp otyr. Bul týraly QR Premer-Mınıstri Oljas Bektenov aıtty.
«Jyl saıyn elimizde myńǵa jýyq tabıǵı órt bolady. Tilsiz jaý adam ómirine, sol sııaqty qorshaǵan ortaǵa da orasan qaýip tóndiredi. Ótken jyly 116 myń gektardan astam orman qory órtenip ketti. Elimizdegi orman alqaptary onsyz da óte az, olardyń aýmaǵy órt saldarynan jyl saıyn sırep barady», - dedi O.Bektenov Úkimet otyrysynda.
Ekologııaǵa keltirilgen zııandy eseptemegende, materıaldyq shyǵyn 160 mlrd teńgeden asyp tústi.
«Qazgıdromettiń boljamyna sáıkes, bıyl jaz aılary ystyq ári qurǵaqshylyq bolady dep kútilýde. Ásirese, elimizdiń batysy men shyǵysynda jáne ońtústiginde aptap ystyq uzaq saqtalýy múmkin. Demek, órt qaýpi kúsheıe túsedi. Bıyldyń ózinde 30-ǵa jýyq orman órti tirkeldi. Máselen, ótken jyly órtten qatty zardap shekken «Semeı ormany» aýmaǵy bıyl taǵy da otqa orandy. Abaı oblysynyń ákimdigi baqylaýdy kúsheıtýi kerek», - dedi Úkimet basshysy.
Almaty oblysynda Іle-Balqash tabıǵı rezervatynyń aýmaǵynda da qamys órtenip, úlken aýmaqqa jaıylyp ketti. Aqtóbe, Atyraý, Qaraǵandy, Jambyl jáne Qyzylorda oblystarynda qamys pen qýraǵan shóp janyp, órtke ulasty.
«Qazir múddeli memlekettik organdar Tabıǵı órtterdiń aldyn alý jáne olardy joıý jónindegi is-sharalar josparyn iske asyryp jatyr. Alaıda keıbir salalarda bul jumystar tıisti deńgeıde júrgizilmeı otyr. Aqmola, Almaty, Shyǵys Qazaqstan, Jambyl, Abaı jáne Ulytaý oblystarynda mıneraldanǵan jolaqtardy jasaý endi ǵana bastalǵan, qajetti kólemniń úshten birine áreń jetedi. Aqtóbe, Pavlodar, Qaraǵandy, Soltústik Qazaqstan oblystarynyń aýyldaryndaǵy aýmaqtar áli kúnge deıin qýraǵan shóp pen qoqystardan tazartylmaǵan», - deıdi Premer-Mınıstr.
Osyǵan baılanysty óńir ákimderine osy baǵyttaǵy jumysty kúsheıtip, barlyq problemalyq máselelerdi jeke baqylaýǵa alý tapsyryldy.
«Ekologııa mınıstrligi osy ýaqytqa deıin Qazavıaormanqorǵaý mekemesiniń 12 bólimshesinde tikushaqtar kezekshiligin rettegen joq. Bul jumysty tezdetý kerek. Sondaı-aq órt qaýpi joǵary óńirlerde sý tógetin qurylǵysy bar memlekettik avıatsııa tikushaqtarynyń kezekshiligin uıymdastyrýdy pysyqtaǵan jón», - dedi O. Bektenov.
