Bıylǵy jarty jylda jumyssyzdyq qansha paıyz boldy - Eńbek mınıstrligi
ASTANA. KAZINFORM – Bul týraly Eńbek jáne halyqty áleýmettik qorǵaý mınıstrliginiń jarty jylda atqarlaǵn jumystaryna arnalǵan keńeıtilgen otyrysta málim boldy.
Jıynda eńbek naryǵyndaǵy ahýal týraly baıandama jasaǵan vıtse-mınıstr Eldar Kúzenbaevtyń sózinshe, birinshi jartyjyldyqtyń qorytyndysy boıynsha elimizdegi jumyssyzdyq deńgeıi 4,5%-dy qurady.
-Jumyspen qamtý qyzmetin damytýdyń basym baǵyttarynyń biri – memlekettik qyzmetterdiń jedeldigin, ataýlylyǵyn jáne sapasyn arttyrýǵa múmkindik beretin tsıfrlyq tehnologııalar men jasandy ıntellekt negizindegi sheshimderdi engizý, – dedi ol.
Al vıtse-mınıstr Vıktorııa Shegaı óz baıandamasynda medıtsınalyq-áleýmettik saraptama júıesin damytý jáne áleýmettik qorǵaý júıesin jetildirý baǵytynda atqarylyp jatqan jumystar týraly aıtty.
-Medıtsınalyq-áleýmettik saraptamany syrttaı júrgizý tetigin engizý jalǵasyp jatyr. Búginde kýálandyrýlardyń 45%-dan astamy osy formatta ótkiziledi. Áleýmettik qorǵaý júıesin damytý zańnamany jetildirý, tsıfrlyq servısterdi engizý, ońaltý ınfraqurylymyn damytý jáne memlekettik baqylaý tetikterin kúsheıtý arqyly keshendi túrde júzege asyrylyp jatyr, – dedi Vıktorııa Shegaı.
Áleýmettik-eńbek salasyn tsıfrlyq transformatsııalaý barysy týraly vıtse-mınıstr Baqtııar Jazyqbaev baıandady.
-Járdemaqylar men áleýmettik tólemderdi avtomatty túrde taǵaıyndaý tetigi engizildi. Memlekettik qyzmetterdiń toǵyz túri boıynsha qyzmet kórsetý merzimi bir kúnge deıin qysqartylyp, eńbek shyǵyndary ońtaılandyryldy, sondaı-aq ótinishterdi qaraý barysynda jiberiletin qatelikter sany edáýir azaıtyldy, – dedi ol.
Otyrysty qorytyndylaǵan Asqarbek Ertaev aldaǵy kezeńde erekshe nazar aýdarýdy talap etetin baǵyttardy aıqyndady. Olardyń qatarynda medıtsınalyq-áleýmettik saraptama sapasyn arttyrý, ońaltý ortalyqtarynyń qurylysyn belgilengen merzimde aıaqtaý jáne óńirlik jumyspen qamtý josparlarynyń oryndalýyn qamtamasyz etý máseleleri bar.
-Osy baǵyttardyń árqaısysy boıynsha nátıjeli ári úılestirilgen jumysty qamtamasyz etý mańyzdy. Qajetti sheshimderdi ýaqytyly qabyldap, vedomstvoaralyq ózara is-qımyldy tıimdi uıymdastyrý jáne qoıylǵan mindetterdiń sapaly oryndalýyn qamtamasyz etý – basty mindet, – dep atap ótti mınıstr.
Otyrys qorytyndysy boıynsha mınıstrliktiń qurylymdyq bólimsheleri, komıtetteri men vedomstvolyq baǵynysty uıymdarynyń basshylaryna josparlanǵan is-sharalardyń iske asyrylýyn, sondaı-aq 2026 jyldyń sońyna deıin belgilengen nysanaly kórsetkishterdiń oryndalýyn qamtamasyz etý tapsyryldy.
