Bıylǵy jarty jylda qurylys 15,2 paıyzǵa ósken: mınıstr qurylysshylardy quttyqtady
ASTANA. KAZINFORM – Qazaqstan Respýblıkasy Ónerkásip jáne qurylys mınıstri Ersaıyn Naǵaspaev Qurylysshy kúni qarsańynda sala qyzmetkerleri men ardagerlerin kásibı merekelerimen quttyqtap, úzdik mamandardy vedomstvolyq nagradalarmen marapattady, dep habarlaıdy QR Ónerkásip jáne qurylys mınıstrliginiń baspasóz qyzmeti.
Saltanatty jıynda mınıstr qurylysshylardyń kásibı biliktiligi, jaýapkershiligi men qajyrly eńbeginiń eldiń áleýmettik-ekonomıkalyq damýyna qosyp otyrǵan úlesin erekshe atap ótti.
Mınıstrdiń aıtýynsha, ótken jyly Qazaqstanda 20 mıllıon sharshy metrden astam turǵyn úı paıdalanýǵa berilip, bul rekordtyq kórsetkishke aınaldy. Sonymen qatar qurylys jumystarynyń kólemi 2025 jyly 17,5 paıyzǵa ósse, bıylǵy birinshi jartyjyldyqtyń qorytyndysy boıynsha ósim 15,2 paıyzdy qurady.
Sondaı-aq otandyq qurylys salasynyń jetistikteri halyqaralyq deńgeıde de moıyndalyp otyr. Bıyl Qazaqstannyń ornyqty ári jaıly qalalyq ortany damytý tájirıbesi Birikken Ulttar Uıymy alańynda tanystyrylyp, Astananyń damý úlgisi halyqaralyq qaýymdastyq tarapynan joǵary baǵalandy.
— Memleket basshysy Qasym-Jomart Toqaevtyń tapsyrmasyna sáıkes qurylys salasyn jańa deńgeıge kóterýge baǵyttalǵan júıeli reformalar júzege asyrylý ústinde. Sonyń mańyzdy qadamdarynyń biri – bıyl kúshine engen jańa Qurylys kodeksi. Sizderdiń qajyrly eńbekterińizdiń arqasynda jańa qalalar men eldi mekender boı kóterip, zamanaýı ınfraqurylym nysandary salynyp jatyr. Aldaǵy ýaqytta da kásibı sheberlikterińiz ben adal eńbekterińiz aýqymdy jobalardyń tabysty iske asýyna jáne azamattar úshin jaıly ómir súrý ortasyn qalyptastyrýǵa úles qosa beredi dep senemin, – dedi Ersaıyn Naǵaspaev.
Іs-shara sońynda qurylys salasynyń ardagerleri men mamandary «Qurmetti qurylysshy», «Qurmetti sáýletshi» tósbelgilerimen, «Eńbek ardageri» medalimen jáne Alǵys hattarmen marapattaldy.
Aıta keteıik, osyǵan deıin Ersaıyn Naǵaspaev 2030 jylǵa deıin óńdeý ónerkásibinde 478 joba iske qosylatynyn aıtqan bolatyn.
