Bıylǵy vegetatsııalyq kezeńde «Shardaraǵa» qansha sý kelýi múmkin

TAShKENT. KAZINFORM – Bıyl «Shardara» qoımasyna keletin sý byltyrǵydan kóp bolýy yqtımal. Mundaı boljammen «Syrdarııa» basseındik sý sharýashylyǵy birlestigi basshysynyń orynbasary, Qazaqstan ókili Mereke Imanǵalıev bólisti, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

Málim bolǵandaı, qazir «Shardara» sekýndyna 262 tekshe metr sý qabyldap jatyr. Al Qyrǵyzstannyń «Toqtaǵul» sý qoımasynda jınalǵan tirshilik náriniń mólsheri buǵan deıingi kólemnen birshama kóp.

«Qazaqstandaǵy «Shardara» sý qoımasyna kelip túsetin sýdyń kólemi Qyrǵyzstannyń «Toqtaǵul» jáne Tájikstannyń «Bahrı Tochık» sý qoımalarynyń jumysyna jáne Ózbekstandaǵy sý sharýashylyǵy rejımine baılanysty. Qazirgi ýaqytta «Toqtaǵul» sý qoımasynda shamamen 7 mlrd 748 mln tekshe metr sý jınaqtalǵan», - dedi Mereke Imanǵalıev Kazinform tilshisiniń saýalyna jaýap bere otyryp.

Jaz aılarynda kún ysyp, muzdyqtar tez erı bastaıdy. Mamandardyń boljamyna sáıkes, sol kezeńderde sýdyń kólemi ulǵaıa túsýi múmkin.

Aıta keteıik, taıaýda Shymkent qalasynda Memleketaralyq sý sharýashylyǵyn úılestirý komıssııasynyń 86-shy otyrysy ótti. Komıssııa músheleri vegetatsııalyq kezeńdegi jaǵdaıdy baqylaý úshin endi jylyna 2 emes, 4 ret kezdesedi.

Shymkentte ótken otyrysta mamandar boljamdy naqtylap, ótken jyldyń qorytyndysyn shyǵardy.

«Shymkentte ótken 86-shy otyrystyń boljamy boıynsha, bıylǵy vegetatsııalyq kezeńde Qazaqstannyń «Shardara» qoımasyna 3 mlrd 692 mln tekshe metr sý kelýi kerek. Byltyr odan az kólemde alǵanbyz. Biraq 3 mlrd sý keletin bolsa, onda ol jetýi kerek. Óıtkeni, qys mezgilinde, ıaǵnı vegetatsııaaralyq kezeńde jınalǵan sý bar», - dep túıindedi Mereke Imanǵalıev.