Bıylǵy UBT-da 140 baldy áli eshkim jınaǵan joq

ASTANA. KAZINFORM — Negizgi UBT bastalǵannan beri 211 myń ret test tapsyryldy. Onyń ishinde talapkerlerdiń 74 paıyzy — qazaq, 26 paıyzy — orys, 171 adam aǵylshyn tilinde testileýden ótti. 

UBT bastalǵaly shekti baldy 76% talapker jınady.

Ortasha balǵa keletin bolsaq, ol — 68 ball. Eń joǵary ball — 138, 8 adam 137 ball jınady.

Qazirgi tańda testke qatysýshylardyń basym bóligi, atap aıtqanda, 18 paıyzy — «Matematıka-Fızıka», 16 paıyzy — «Bıologııa-Hımııa» pánder kombınatsııasyn tapsyrdy. 

15 paıyzy — «Shyǵarmashylyq emtıhan» kombınatsııasyn tańdaǵan. 

Erekshe bilim berý qajettiligi bar oqýǵa túsýshiler úshin qolaıly jaǵdaı jasaýdyń arqasynda UBT-ǵa bes aptanyń ishinde 577 talapker qatysty.

Osy aptada joǵary oqý oryndarynyń qabyldaý komıssııasy óz jumysyn bastap, 25 tamyzǵa deıin oqýǵa túsýge qujat qabyldaıdy.

Sondaı-aq, «Pedagogıkalyq ǵylymdar» jáne «Densaýlyq saqtaýǵa» túsýshiler úshin mindetti bolyp tabylatyn emtıhandar bastaldy.

Joǵary oqý oryndary 10 tamyzǵa deıin shyǵarmashylyq emtıhanǵa qatysýǵa ótinish qabyldap, emtıhannyń ózin 7 shilde men 15 tamyz aralyǵynda ótkizedi.

Grant konkýrsyna qujat qabyldaý 13-20 shilde aralyǵynda, al tótenshe jaǵdaı jarııalanǵan 6 oblysta (Aqtóbe, Atyraý, Batys Qazaqstan, Qostanaı, Aqmola, Soltústik Qazaqstan) 13-24 shilde aralyǵynda júzege asady. 

Búgingi tańda 396 ereje buzý faktisi anyqtaldy. Onyń ishinde 267 talapker smartfon, shpargalka jáne basqa da tyıym salynǵan zattardy alyp ótý áreketi saldarynan test tapsyrý múmkindiginen aıyryldy.

Testileý kezinde erejelerdi buzǵany úshin aýdıtorııadan 120 adam shyǵarylyp, olardyń nátıjeleri joıyldy.

Beınejazbany teksergen soń ereje buzǵan 9 adamnyń nátıjesi joıyldy.

Bógde tulǵalar anyqtalǵan joq.

Aıta ketsek, 2024 jylǵy UBT aıaqtalǵannan keıin sol jyldyń 31 qazanyna deıin testileýdiń beınejazbasyna taldaý jasalady.

Tyıym salynǵan zattardy paıdalaný nemese ereje buzý faktileri anyqtalǵan jaǵdaıda talapkerdiń UBT nátıjesi joıylady.