Bıylǵy І toqsanda qazaqstandyqtar azyq-túliktiń qaı túrin kóp tutyndy
ASTANA. KAZINFORM - 2026 jyldyń I toqsanynyń qorytyndysy boıynsha Qazaqstanda ótken jyldyń sáıkes kezeńimen salystyrǵanda negizgi azyq-túlik ónimderiniń basym bóligin tutyný kólemi artty.
Ulttyq statıtıska bıýrosynyń málimetterine qaraǵanda, bul derekter halyqtyń turmys deńgeıi boıynsha úı sharýashylyqtaryna júrgizilgen iriktemeli zertteý nátıjesinde alyndy.
Orta eseppen bir turǵynǵa toqsan ishinde 20,7 kg et jáne et ónimderi tıesili boldy. Ótken jyldyń sáıkes kezeńinde bul kórsetkish 20,6 kg bolǵan. Sút jáne sút ónimderin tutyný 57,2 lıtrden 58,1 lıtrge, jumyrtqa 52 danadan 54 danaǵa, kókónis 18,3 kg 18,7 kg, kartop 11,3 kg 11,4 kg. deıin ósti. Sondaı-aq balyq pen teńiz ónimderin tutyný 3,5 kg-nan 3,6 kg-ǵa deıin artty.
Sonymen qatar, birqatar sanat boıynsha tómendeý baıqaldy. Atap aıtqanda, jarma jáne dándi daqyldar ónimderin tutyný 31 kg-nan 30,6 kg-ǵa deıin qysqardy. Maılar men tońmaılardy tutyný ózgerissiz qaldy. Jemis, jıdek pen jańǵaqty tutyný 17,5 kg-nan 17,4 kg-ǵa, qant, tosap jáne baldy tutyný 10,8 kg-nan 10,3 kg-ǵa deıin azaıdy.
2026 jyldyń I toqsanynda Qazaqstannyń bir turǵyny orta eseppen 11,4 kg kartop, 6 kg birinshi surypty unnan daıyndalǵan bıdaı nany, 6 kg sıyr eti, 4,8 kg alma, 4,6 kg qumsheker, 4,2 kg kúrish, 3,1 lıtr aıran, 2,6 kg makaron ónimderi, 2,4 lıtr shıki sút, 2,1 kg jańa nemese salqyndatylǵan balyq, 54 jumyrtqa jáne 0,3 kg qara shaı tutynǵan.
2026 jyldyń I toqsanynda jan basyna shaqqandaǵy kókónis tutyný kólemi orta eseppen 18,7 kg boldy. 2025 jyldyń sáıkes kezeńimen salystyrǵanda bul kórsetkish 2,2% ósip, 18,3 kg-nan 18,7 kg-ǵa jetti.
Qala turǵyndary aýyl turǵyndaryna qaraǵanda kókónisti kóbirek tutynǵan. Qalalyq jerde ortasha kórsetkish bir adamǵa 19,3 kg bolsa, aýyldyq jerde 17,6 kg boldy.
Kókónisti eń kóp tutyný Almaty qalasynda tirkeldi – jan basyna shaqqanda 23,2 kg. Odan keıin Jetisý oblysy – 22,8 kg jáne Túrkistan oblysy – 21,4 kg. Eń tómengi kórsetkishter Shyǵys Qazaqstan oblysynda – 16,5 kg, sondaı-aq Abaı jáne Almaty oblystarynda – árqaısysynda 16 kg boldy.
Et jáne et ónimderin tutynýdyń eń joǵary deńgeıi Shyǵys Qazaqstan, Jetisý, Aqmola jáne Qaraǵandy oblystarynda tirkeldi. Al eń tómengi kórsetkish Túrkistan oblysynda baıqaldy.
Osyǵan deıin elde azyq-túlik óndirisi 14,7%-ǵa ósip, 2,1 trln teńgege jetkeni týraly jazdyq.
