Bıylǵy on aıda óndirilgen qus etiniń kólemi 7,2 paıyzǵa artqan
ASTANA. KAZINFORM – Bıylǵy on aı qorytyndysy boıynsha elimizde 360 myń tonnadan astam qus eti óndirildi, bul ótken jyldyń sáıkes kezeńimen salystyrǵanda 7,2%-ǵa kóp, dep habarlaıdy QR Aýyl sharýashylyǵy mınıstrliginiń baspasóz qyzmeti.
Baspasóz qyzmetiniń málimetterine qaraǵanda, qus sharýashylyǵy memleketimizdiń agroónerkásip keshenindegi eń qarqyndy damyp kele jatqan salalardyń biri.
Búgingi tańda Qazaqstanda 43 jumyrtqa baǵytyndaǵy qus fabrıkasy, 36 et óndiretin kásiporyn jáne 7 asyl tuqymdy sharýashylyq jumys isteıdi. Olardyń úsheýi broıler, úsheýi jumyrtqa baǵytynda, al bireýi úırek sharýashylyǵy sanatynda.
Ulttyq statıstıka bıýrosynyń derekteri boıynsha, bıylǵy 1 qazanda eldegi jalpy qus sany 49 mıllıonǵa jetti, bul ótken jylmen salystyrǵanda 6,5%-ǵa artyq. Ótken jyly 4,5 mıllıard dana jumyrtqa óndirilip, ishki naryq tolyq qamtamasyz etildi. Sol jyly qus eti óndirisi 360 myń tonnany qurady.
Investıtsııalyq jobalardyń arqasynda sońǵy bes jyl ishinde eldi qus etimen qamtamasyz etý deńgeıi 58%-dan 79%-ǵa deıin artty. Memleket bul salany belsendi qoldap otyr.
Janýar sharýashylyǵyn sýbsıdııalaý qaǵıdalary aıasynda óndirýshilerge birqatar qoldaý sharalary kórsetiledi.
Et baǵytyndaǵy qus sharýashylyǵynda balapandar satyp alýǵa jáne qus eti óndirisiniń ózindik qunyn arzandatýǵa sýbsıdııalar qarastyrylǵan, al jumyrtqa baǵytynda — balapandardyń jańa tuqymyn satyp alýǵa sýbsıdııalar bólinedi.
Sonymen qatar, ınvestıtsııalyq sýbsıdııalaý aıasynda memleket qus eti óndirisi, asyl tuqymdy reprodýktorlar jáne jumyrtqa fabrıkalaryn qurý nemese keńeıtý kezinde salynǵan negizgi qarajattyń 25%-yna deıin óteıdi.
Importqa táýeldilikti azaıtý jáne azyq-túlik qaýipsizdigin nyǵaıtý maqsatynda jańa óndiristik qýattardy iske qosý boıynsha aýqymdy jumystar júrgizilip jatyr. Máselen, byltyr jalpy qýaty jylyna 15,9 myń tonna qus etin óndiretin 6 joba iske qosyldy, ınvestıtsııa kólemi 5,7 mlrd teńge. 2025 jyly jalpy qýaty jylyna 45 myń tonna bolatyn 5 joba júzege asyrylyp jatyr, ınvestıtsııa kólemi 26 mlrd teńge.
Aldaǵy úsh jylda jalpy qýaty 241 myń tonna jáne ınvestıtsııa kólemi 167,9 mlrd teńge bolatyn 8 iri kásiporyndy iske qosý josparlanǵan.
Nátıjesinde 2027 jylǵa qaraı Qazaqstan ishki naryqty qus etimen tolyq (110%) qamtamasyz etip, sonymen qatar eksporttyq jetkizilimderdi ulǵaıta alady.
Osyǵan deıin qus etine suranystyń neshe paıyzyn otandyq sharýashylyqtar qamtamasyz etip otyrǵany týraly jazdyq.