Bıylǵy oqý jylynda qoldanysqa engiziletin jańa oqýlyqtardyń jobasy talqylaýǵa shyǵaryldy
ASTANA. KAZINFORM – 2025-2026 oqý jyly qoldanysqa engiziletin 4-synyptarǵa arnalǵan oqýlyqtar qoǵamdyq talqylaýǵa shyǵaryldy. Ol úshin Bilim mazmunyn saraptaý ortalyǵynyń https://bmso.kz saıtyndaǵy «Oqý ádebıetterin qoǵamdyq talqylaý» bólimine ótý kerek. Bul týraly QR Oqý-aǵartý mınıstrliginiń baspasóz qyzmeti habarlady.
Talqylaýǵa muǵalimder, ata-analar, qoǵamdyq uıymdardyń ókilderi men mektep oqýlyqtarynyń sapasyna beı-jaı qaramaıtyn barlyq azamattar qatysa alady. Saıtta kelesi pánder boıynsha oqýlyqtardyń mazmunymen tanysýǵa bolady: «Orys tili» (oqytý qazaq tilinde júrgiziletin mektepter úshin); «Eńbekke baýlý», «Beıneleý óneri», Shet tilderi (aǵylshyn, nemis, frantsýz), sondaı-aq «Tsıfrlyq saýattylyq» boıynsha elektrondy oqýlyq nusqalary.
«Barlyq kelip túsken syn-eskertpeler, men oqýlyqtardyń sapasy men mazmunyn jaqsartýǵa qatysty usynystar saraptama barysynda eskeriledi. Talqylaý bıylǵy jyldyń 30 qyrkúıegine deıin jalǵasady», - delingen QR Oqý-aǵartý mınıstrliginiń baspasóz qyzmeti taratqan resmı aqparatta.
Atap ótý kerek, qoldanystaǵy zańnama boıynsha búginde oqýlyqtar saraptamanyń bes kezeńinen ótedi: ǵylymı-pedagogıkalyq saraptama, oqýlyqtardy pılottyq mektepterde synaqtan ótkizý, qoǵamdyq-pedagogıkalyq talqylaý, pándik saraptalyq komıssııanyń qaraýy. Qazirgi ýaqytta atalǵan oqýlyqtar qoǵamdyq talqylaýmen qatar, elimizdiń birneshe óńirlerinde 31 pılottyq mektepte synaqtan ótip jatqanyn atap ótken jón.
Ǵylymı-pedagogıkalyq saraptamaǵa ǵalymdar men biliktilik sanaty «zertteýshi pedagogten» tómen emes praktık-muǵalimder tartylady. Sarapshylar arnaıy oqý kýrsynan ótip, sarapshy sertıfıkatyn alǵan jáne respýblıkalyq sarapshylar bazasyna engen. Osyndaı joǵary talaptar synaq jáne pándik saraptalyq komıssııa qatysýshylaryna da qoıylady.
Pándik saraptama komıssııasynyń sheshimimen saraptamanyń barlyq kezeńderinen ótken oqýlyqtar mektepterde paıdalaný úshin jáne QR Oqý-aǵartý mınıstrligi bekitetin oqýlyqtar tizbesine engizý úshin usynylatyn bolady.
