Bıylǵy oqý jylynda 93 myńnan astam bilim granty bólindi
ASTANA. KAZINFORM – Prezıdent Joldaýyn júzege asyrý aıasynda Úkimet kásiptik jáne joǵary bilimniń qoljetimdiligin arttyrý boıynsha júıeli sharalar qabyldap jatyr. Negizgi qadamdardyń biri tikeleı qarjylandyrýdyń edáýir ulǵaıýy boldy: bıylǵy oqý jylynda 93 myńnan astam bilim granty bólindi, bul burynǵy kórsetkishterden 50% artyq.
Úkimettiń baspasóz qyzmeti habarlaǵandaı, granttarmen qatar stýdentterge materıaldyq qoldaý da kúsheıtildi. 2024 jyldyń qyrkúıeginen bastap bakalavrıat stýdentter shákirtaqysy 20%-ǵa, al magıstranttar men doktoranttar shákirtaqysynyń mólsheri 15%-ǵa kóterildi.
Otbasylardy qoldaý úshin «Keleshek» jınaq júıesi jáne «Ulttyq qor – balalarǵa» baǵdarlamasy sııaqty erte jastan bastap balaǵa bilim berý kapıtalyn qalyptastyrýǵa múmkindik beretin uzaqmerzimdi jańa quraldar engizildi. Sonymen qatar ınfraqurylym máselesi de sheshilip jatyr. Stýdentter úshin qolaıly jaǵdaı jasaý maqsatynda 2018 jyldan beri búkil respýblıka boıynsha 62 myń orynǵa arnalǵan jańa 251 stýdentter úıi salyndy.
Bul jumys Jumysshy mamandyqtary jyly aıasynda jumysshy kásipteriniń bedelin arttyrýǵa, suranysqa ıe kadrlardy sapaly daıarlaýǵa jaǵdaı jasaýmen tikeleı baılanysty.
– Biz akademııalyq ınfraqurylymdy belsendi damytyp jatyrmyz. Prezıdent tapsyrmasy boıynsha 2027 jylǵa deıin jyl saıyn keminde 10 myń tósek-oryn paıdalanýǵa beriledi. Bıyl 10 myńnan astam tósek-orynǵa arnalǵan 29 jataqhana iske qosylady, sonyń nátıjesinde Almatydan basqa barlyq óńirde jataqhana máselesi sheshildi. Sondaı-aq elimizde Student Residence úlgisi boıynsha jaılylyǵy joǵary zamanaýı jataqhanalar salynyp jatyr. 2023 jyldan bastap jastardyń áleýmettik osal sanattaryndaǵy stýdentter úshin jataqhanada turý shyǵyndaryn óteýdi engizý óte mańyzdy qadam boldy, - dep atap ótti Ǵylym jáne joǵary bilim mınıstri Saıasat Nurbek.
Bıyl memlekettik bilim granttary 99 paıyzǵa ıgerildi. Bul týraly Úkimet otyrysynda Ǵylym jáne joǵary bilim mınıstri Saıasat Nurbek aıtty.