Bıylǵy qysta aýa raıy jıi qubylady: Qazgıdromet boljam jasady
ASTANA. KAZINFORM — Qazgıdromet kompanııasy aldaǵy qys mezgiline arnalǵan aýa raıynyń konsýltatıvtik boljamyn usyndy.
Aldyn ala boljam boıynsha respýblıkanyń basym bóliginde qys mezgili qońyrjaı jyly bolady, jaýyn-shashyn mólsheri klımattyq norma shamasynda kútiledi. Biraq keıbir kezeńde burqasyn, ekpindi jel, kóktaıǵaq qubylystary, tuman, mol jaýyn-shashynnyń túsýi boljanyp otyr.
Tipti qys aılarynda aýa temperatýrasynyń aýytqýy jıi baıqalmaq, ıaǵnı «temperatýralyq kubylýlar» kútiledi, jyly kúnder sýyq aıazdy tolqyndarmen almasyp otyrady.
— Jalpy jeltoqsan aıy jyly, jaýyn-shashyn mólsheri klımattyq norma shamasynda bolady. Jeltoqsandaǵy eń qarqyndy sýyq tolqyn birinshi onkúndik sońynda kútiledi. Eldiń soltústiginde, shyǵysynda jáne ortalyǵynda aýa temperatýrasy túnde -23-28 gradýs aıaz, kúndiz -13-18 gradýs aıazǵa deıin tómendeýi múmkin. Ekinshi jáne úshinshi onkúndikterde túnde temperatýralyq fon -15-20 gradýs aıazdan -5-10 gradýs aıazǵa deıin, kúndiz -3 gradýs aıazdan -5-10 gradýs aıazǵa deıin, shyǵysta — keıbir kúni aýa temperatýrasy túnde -25-35 gradýs aıazǵa deıin, kúndiz -15-20 gradýs aıazǵa deıin tómendeıdi, — dedi «Qazgıdromet» RMK uzaq merzimdi aýa raıy boljamdary basqarmasynyń basshysy Juldyz Isabekova elordada ótken brıfıngte.
Batysta jáne eldiń ońtústik bóliginde jeltoqsannyń basynda kún jylıdy. Birinshi onkúndiktiń sońynda aýa temperatýrasy túnde -12-17 aıazǵa, kúndiz -3-8 aıazǵa deıin birtindep tómendeýi boljanady. Sodan keıin aýa temperatýrasynyń túnde -0-5 aıazdan -7-12 aıazǵa deıin aýytqýy kútiledi, kúndiz 0-8 gradýs shamasynda jyly aýa raıy bolmaq.
Qańtar aıynda respýblıka aýmaǵynyń basym bóliginde aýa raıy da, jaýyn-shashyn mólsheri de norma shamasynda boljanyp otyr. Elimizdiń ońtústigi men ońtústik-shyǵysynyń taýly jáne taý bókterindegi aýdandarynda normadan kóp jaýyn-shashyn kútiledi (Túrkistan, Jambyl, Almaty, Jetisý jáne Shyǵys Qazaqstan oblystarynyń taýly jáne taý bókterindegi aýdandarynda).
— 2026 jyldyń aqpan jáne naýryz aılary jyly bolady, jaýyn-shashyn mólsheri qalypty, tek naýryzda respýblıkanyń ońtústik jáne ońtústik-shyǵysyndaǵy taýly jáne taý bókterindegi aýdandarda normadan kóp (Túrkistan, Jambyl, Almaty oblystarynyń, Jetisý oblysynyń jáne Shyǵys Qazaqstan oblysynyń taýly jáne taý bókterindegi aýdandarynda). Qorytyndylaı kele, qatty jaýyn-shashynnyń túsýine jáne qardyń erý kezeńderimen aıazdy aýa raıynyń jıi ózgerýine baılanysty topyraqta jáne qar jamylǵysynda muz qabyrshyǵy paıda bolady. Munyń bári 2026 jylǵy sý tasqyny kezeńinde keri áser etýi múmkin, — dedi Qazgıdromet mamany.
Aıta keteıik, Qazgıdromet 17 qarashada aýa raıyna baılanysty birqatar óńirde eskertý jarııalady. Búgin elimizdiń basym bóliginde tuman túsip, jel kúsheıedi.