Bıylǵy qyrkúıekte Astanada jańa bilim berý jobasy - NGS jumysyn bastaıdy
ASTANA. KAZINFORM – Bıyl jańa oqý jylynan bastap elordada jańa bilim berý jobasy – NGS Astana mektebi óz jumysyn bastaıdy. Nelikten bul bilim ordasyn NGS jelisiniń flagmany dep ataıdy jáne oqýshylardy ne kútip turǵany jaıly mektep ókilderi aıtyp berdi.
Bilim berý mekemesiniń baspasóz qyzmeti taratqan aqparatqa sáıkes, bul tek mektep jelisin keńeıtý emes. Almatyda 7 jyldan beri tabysty damyp kele jatqan NGS endi halyqaralyq standarttarǵa saı flagmandyq mektepti iske qospaq.
– Biz zamanaýı sáýlettik sheshimder, úzdik pedagogtar, qaýipsiz bıometrııalyq orta, 390-nan astam beınekamera, joǵary tehnologııalyq zerthanalar, tsıfrlyq platforma jáne jan-jaqty damýǵa arnalǵan ınfraqurylymdy bir keńistikke toǵystyryp otyrmyz. Onyń ishinde 25 metrlik basseın, kásibı sport zaly, mýzyka jáne óner stýdııalary bar, – dep atap ótti mektep ókilderi.
NGS málimetinshe, sońǵy jyldary oqýshylar olımpıadalar men túrli baıqaýlarda 6 myńnan astam jeńiske qol jetkizgen. Álemniń jetekshi ýnıversıtetterinen 320-dan astam shaqyrtý alǵan. Jalpy stıpendııalar men granttardyń kólemi 2 mıllıon AQSh dollarynan asyp otyr. 9 túlek «Altyn belgi» ıegeri atansa, 32 túlek oqýdy úzdik attestatpen támamdaǵan.
NGS mektepteriniń árqaısysynda kúsheıtilgen akademııalyq súıemeldeý men mazmundy synyptan tys baǵdarlama qarastyrylǵan. NGS Astana bul dástúrdi jalǵastyryp qana qoımaı, ony jańa deńgeıge kótermek.
Mekteptegi oqý kúni tańǵy 08:00-den keshki 20:00-ge deıin jalǵasady. Bul ýaqyt aralyǵynda oqýshylarǵa tórt ret tamaq jáne úı tapsyrmasyn oryndaýǵa múmkindik beriledi, sondaı-aq 40-tan astam úıirmege qatysýǵa jaǵdaı jasalǵan. Buǵan qosa, tálimgerlerdiń turaqty qoldaýy qarastyrylǵan.
7 jyl ishinde NGS Almatyda pándik saralaý, jeke oqý traektorııalary jáne negizgi pánderdi tereńdetip oqytýǵa negizdelgen júıe qalyptasty.
Praktıkalyq matematıka, logıka, akademııalyq aǵylshyn jáne qazaq tilderi jetekshi sheteldik ýnıversıtetterdiń talaptaryna saı oqytylady. Olımpıadalyq baǵyt bastaýysh synyptan bastap damytylyp keledi – oqýshylarmen halyqaralyq deńgeıde jeńiske jetken tálimgerler jumys isteıdi.
Árbir ata-anaǵa balasynyń jetistikteri, usynystar men joǵary oqý ornyna túsý jospary kórsetilgen Jeke progress kartasy usynylady. Barlyq málimetter NGSmart tsıfrlyq bilim berý ekojúıesinde biriktirilgen. Bul biregeı platformada sabaq kestesi, úlgerim, onlaın tólem múmkindigi jáne basqa da qyzmetter qamtylǵan.
Mektep ómirinde erekshe oryn alatyn NGS Parents Club – belsendi ata-analardyń qaýymdastyǵy. Olar oqý protsesine atsalysyp, balalarǵa qolaıly ortany damytýǵa birge úles qosady.
NGS ókilderi jańa flagman mektep bilim ordasynyń basty mıssııasyn kúsheıtetinine senimdi. Bul degenimiz túlekter qaýymdastyǵyn qurý jáne qoldaý. Búginde túlekter álemdik ýnıversıtetterde jetekshi oryndarǵa ıe bolyp otyr. Bul – ulttyq ta, jahandyq ekonomıka úshin de mańyzdy.
Eske salsaq, Qasym-Jomart Toqaev bilim berý úderisine tsıfrlyq tehnologııalar men jasandy ıntellektini jedel engizýdi tapsyrǵan bolatyn.
