Bıylǵy qajylyq maýsymy 15 mamyr - 5 maýsym aralyǵynda ótedi
ASTANA. KAZINFORM — Qazaqstan musylmandar dinı basqarmasynda qajylyq maýsymyn uıymdastyrý máselelerine arnalǵan onlaın jıyn ótti. Bul týraly dinı basqarmanyń baspasóz qyzmeti máim etti.
Jıynǵa Qazaqstan musylmandary dinı basqarmasy Tóraǵasynyń orynbasary, naıb múftı Kenjetaı Baıkemeluly, Qazaqstan qajylyq mıssııasy ókilderi jáne qajylyq saparyn uıymdastyrýǵa ruqsat alǵan 14 týroperatordyń basshylary qatysty. Jıynnyń negizgi maqsaty — bıylǵy qajylyq maýsymyn otandastarymyz úshin barynsha qolaıly, qaýipsiz jáne joǵary deńgeıde uıymdastyrý.
— Bıylǵy maýsymda konkýrstyq negizde qajylardy tasymaldaý jumystary Qazaqstandyq Air Astana jáne SCAT, sondaı-aq Saýdııalyq Flyadeal áýekompanııalarymen júzege asady. Ushý reısteri elimizdiń iri megapolısteri — Almaty, Astana jáne Shymkent qalalarynan tikeleı Djıdda men Mádına qalalaryna baǵyttalady. Qajylardyń elge qaıtý sapary da osy eki qaladan kezeń-kezeńimen josparlanǵan. Bıylǵy qajylyq sapary 15 mamyr men 5 maýsym aralyǵynda ótedi, — delingen habarlamada.
Jıyn barysynda, qajylardyń Qazaqstan aýmaǵynan tıisti týrkodpen shyǵýy, vaktsınatsııa máselesi, qajylyq barysynda Saýd Arabııasynyń zańdaryn oryndaý, Qazaqstandyq kvotamen shetel azamattaryn aparmaý máselesi jáne qajylyqty uıymdastyrýǵa ruqsat alǵan otandyq 14 týrıstik fırma ókilderiniń óz usynystary men suraqtary ortaǵa salyndy.
Kezdesý sońynda Qazaqstan qajylyq mıssııasynyń tóraǵasy, naıb múftı Kenjetaı Baıkemeluly bıylǵy qajylyq maýsymyn Qazaqstan musylmandary úshin rýhanı turǵyda mazmundy ári tehnıkalyq jaǵynan minsiz ótkizý barlyq tarapqa qoıylatyn basty talap ekenin atap ótti.
Eske sala keteıik, buǵan deıin Qazaqstan musylmandary dinı basqarmasy qajylyq jáne umra salasynda qyzmet kórsetetin tájirıbeli týroperatorlar arasynda adal ári ádil básekelestikke qol jetkizý úshin konkýrs jarııalaǵanyn jazǵan edik.
Budan bylaı Saýd Arabııasy qajylyq erejelerin buzǵandarǵa qatań aıyppuldar engizgenin eske salamyz.