Bıylǵy forýmnyń basty ereksheligi — jasandy ıntellektke nazar aýdarylady — Jaslan Mádıev
ALMATY. KAZINFORM — Almatyda Digital Almaty 2025 forýmy bastaldy.
QR Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev 31 qańtar men 1 aqpan arasynda ótetin halyqaralyq forýmnyń basty ereksheligin atap ótti.
— Búgin ótetin Digital Almaty halyqaralyq tehnologııalyq jetinshi forýmynyń ereksheligi — ol jasandy ıntellektige arnalǵan. Álemde tehnologııa qarqyndy damyp jatyr. Ony ár salada paıdalanýǵa múmkindikterimiz bar. Sondyqtan osynda jasandy ıntellekt jobalary, onyń ishinde Halyqaralyq jasandy ıntellekt ortalyǵynyń prezentatsııasy usynylǵan, — dedi mınıstr.
Sondaı-aq brıtandyq óndiristik jáne ǵylymı-zertteý Oxford Insights kompanııasynyń dırektory Rıchard Stırlıng forým jáne jasandy ıntellektiniń bolashaǵy týraly pikir bildirdi.
— Kóptegen bilikti adamdardy biriktirgen forýmǵa qatysyp jatqanyma qýanyshtymyn. Osyndaı forýmdar alańyndaǵy talqylaýlar arqyly biz qoǵam úshin ózekti máselelerdiń sheshimin tabamyz. Biz osy ýaqytqa deıin jasandy ıntellekt jumysyn ońtaılandyrýǵa tyrystyq. Al qazirgi JI ózi oılap taba alatyn modelge aınaldy. Onyń jarqyn mysaldary: ChatGPT jáne DeepSeek. Eń qyzyǵy — osyndaı JI bar kezde ary qaraı ne bolatynyn kórý, — dedi sheteldik meıman.
Eske salaıyq, buǵan deıin Digital Almaty-2025 tsıfrlyq forýmyna 40 myńnan asa adam qatysatynyn jazǵanbyz.