Bıylǵy Eýrovıdenıe baıqaýynda Shveıtsarııa jeńiske jetti
ASTANA. KAZINFORM – Shveıtsarııa ánshi Nemo-nyń oryndaýyndaǵy «The code» ánimen jeńiske jetti. Baıqaý qorytyndysy boıynsha Horvatııa 2-shi, Ýkraına 3-shi, Germanııa 12-shi orynda tur. Fınal Nıderlandtyń baıqaýdan shyǵarylýy jáne Izraıldiń jarysqa qatysýyna narazylyqpen ótti, dep habarlaıdy DW agenttigi.
Shvetsııanyń Malme qalasynda jeksenbi, 12 mamyrǵa qaraǵan túni aıaqtalǵan «Eýrovıdenıe» baıqaýynda Shveıtsarııa Nemo-nyń oryndaýyndaǵy «The Code» ánimen jeńiske jetti.
Ekinshi oryndy «Rim Tim Tagi Dim» ánimen Baby Lasagna ıelendi, «Teresa & Maria» ánin oryndaǵan ýkraınalyq Alyona Alyona & Jerry Heil dýeti úshinshi oryn aldy.
Ulttyq qazylar alqasy men telekórermenderdiń daýys berý nátıjeleri boıynsha alǵashqy «ondyqtaǵy» oryndar bylaı bólindi: 4-shi orynda frantsýz Sliman, 5-shi orynda ızraıldik Eden Golan, 6-shi orynda Irlandııa ánshisi Bambie Thug, Italııa ónerpazy Andjelına Mango — 7-shi orynda, Armenııadan kelgen Ladaniva 8-shi oryn, shvetsııalyq Marcus & Martinus 9-shy, portýgalııalyq Iolanda — 10-shy oryn aldy.
Nemis oryndaýshysy Isaak-qa 12-shi oryn berildi.
Býkmekerlerdiń boljamynsha, Iost Klıaınnyń úzdik «ondyqqa» enýine múmkindigi joǵary boldy.
Alaıda ol baıqaýdyń bastalýyna birneshe saǵat qalǵanda shettetildi.
«Eýrovıdenıe» uıymdastyrýshysy Eýropalyq habar taratý odaǵynyń (EBU) málimdeýinshe, dıskvalıfıkatsııaǵa oryndaýshynyń «orynsyz minez-qulqy» sebep bolǵan.
Túsirilim tobynyń qyzmetkeri onyń ústinen Shvetsııa polıtsııasyna shaǵym túsirgen.
EBU oqıǵanyń egjeı-tegjeın habarlaǵan joq. Biraq Nıderlandtyń Avtotros habar taratýshysy bul sharalardy «durys emes» dep aıyptady.
Malmedegi «Eýrovıdenıedegi» basty daý Izraıldiń baıqaýǵa qatysýyna baılanysty boldy.
Baıqaý bastalmas buryn Eýropalyq habar taratý odaǵy HAMAS lańkesteriniń shabýylyna jaýap retinde Gaza sektoryndaǵy áskerı áreketteri úshin Izraıldi «Eýrovıdenıeden» shyǵarý talaptaryn qabyldamady.
EBU baıqaý ótkiziletin kúnderi qatysýshylarǵa soǵysqa qarsy urandar men palestınalyqtarmen yntymaqtastyq sımvoldaryn kórsetýge tyıym saldy.
