Bıylǵy erekshe jańbyrly jaz egin shyǵymyna qalaı áser etedi

ASTANA. KAZINFORM — Osy jazda eldiń birqatar aımaqtarynda jaýyn-shashyn jıi jaýyp, bul eginniń sapasyna qatysty alańdaýshylyq týǵyzdy. Kazinform agenttigi bul jóninde sarapshylar pikirin usynady.

Qazaqstanda shilde aıy óte jańbyrly boldy. Eldiń basym bóliginde jıi jáne qarqyndy jaýyn-shashyn baıqalady, naızaǵaı, burshaq jáne qatty jel qatar júrdi.

Eldiń ártúrli aımaqtarynda, tipti dástúrli qurǵaq jáne ystyq ońtústikte de aýa temperatýrasy aýytqýda.

QR Aýyl sharýashylyǵy mınıstrligi qazirgi aýa raıy jaqsy ónim alýǵa múmkindik beretinin atap ótti.

«Búginde jergilikti atqarýshy organdardyń málimetinshe, egistiń 70% jaqsy jaǵdaıda, al 30% qanaǵattanarlyq jaǵdaıda. Bul rette, sýarý ezeńindegi, egin jınaý jumystaryndaǵy aýa raıy mańyzdy faktor bolyp sanalady. Qazirgi aýa raıy jaqsy ónimdi boljaýǵa múmkindik beredi», — dep jaýap berdi vedomstvo.

Sáken Seıfýllın atyndaǵy Qazaq agrotehnıkalyq ýnıversıtetiniń eginshilik jáne ósimdik sharýashylyǵy kafedrasynyń qaýymdastyrylǵan professory, PhD doktory Ádilbek Noǵaev ta bıyl jaýyn-shashynnyń eginge áseri týraly óz pikirin aıtty.

«Jańbyr dándi daqyldardyń vegetatsııalyq kezeńin keshiktirýi múmkin, bul egin sapasyna áser etýi múmkin. Biraq, tutastaı alǵanda, ónimdilik bıyl jaqsy bolady dep oılaımyn, biraq bári egin jınaý jaǵdaıyna jáne osy kezeńde jańbyr jaýa ma, joq pa — soǵan baılanysty», — dedi ol.

Sarapshy kóktemniń uzaqqa sozylǵan jańbyry egis naýqanyn keshiktirip, fermerler jumysyna áser etkenin eske saldy.

Kóptegen fermerler egin egýdi tek maýsymda bastaýǵa májbúr boldy.

Onyń pikirinshe, bul bıdaıdyń pisip úlgermeý qaýpin týdyrady jáne onyń sapasyna áser etedi.