81 jastaǵy brıtandyq jazýshy Býker syılyǵynyń eń egde jastaǵy laýreaty atandy
ASTANA. KAZINFORM – 2026 jylǵy Býker syılyǵynyń ıegeri brıtandyq fantast-jazýshy Maıkl Djon Harrıson atandy. Qazylar alqasy onyń adamzatqa tóngen bolashaq apat týraly baıandaıtyn The End of Everything («Báriniń sońy») romanyn joǵary baǵalady, dep habarlaıdy VVS.
81 jastaǵy Harrıson Býker syılyǵy tarıhyndaǵy eń egde laýreat atandy. Buǵan deıin bul rekord 2019 jyly 79 jasynda marapattalǵan Margaret Etvýdqa tıesili bolǵan.
Ol sondaı-aq Býker syılyǵyn alǵan alǵashqy ǵylymı fantastıka ókili atandy.
Kóbine M. Djon Harrıson degen atpen tanymal jazýshy 1960 jyldary New Worlds fantastıkalyq jýrnalynda shyǵarmalaryn jarııalaı bastaǵan. Keıin osy basylymnyń ádebı redaktory qyzmetin atqardy.
Jazýshy osy ýaqytqa deıin 13 roman shyǵarǵan. Onyń eń tanymal shyǵarmalarynyń qatarynda Viriconium («Vırıkonıým») tsıkli, sondaı-aq Light («Jaryq») jáne Nova Swing («Nova Svıng») romandary bar.
Harrıson óz shyǵarmashylyǵyn belgili bir janrǵa jatqyzǵandy unatpaıdy. Soǵan qaramastan, ony «ǵylymı fantastıka ádebıetiniń alyby» dep ataıdy.
– Ol – shyn máninde biregeı oıshyl, óz janryn qalyptastyrǵan ári ıdeıalarǵa baıyppen qaraıtyn jazýshy, – dedi Býker syılyǵy qorynyń basshysy Gebı Výd.
Harrısonǵa syılyq ákelgen The End of Everything romanynyń oqıǵasy jaqyn bolashaqta órbıdi. Álemdi qoǵamnyń kúıreýine ákelgen jumbaq apat jaılaǵannan keıingi kezeń sýretteledi.
Jazýshynyń aıtýynsha, ol osy apatqa deıin bolǵan oqıǵalardy egjeı-tegjeıli sıpattaýdan ádeıi bas tartqan. Osylaısha oqyrmandar da shyǵarma keıipkerleri sııaqty belgisizdik pen baǵdarsyzdyq sezimin bastan ótkerýi kerek.
Eske sala ketsek, byltyr 2025 jylǵy Býker syılyǵynyń jeńimpazy bolyp kanadalyq-vengrııalyq-brıtandyq jazýshy Devıd Saleı tanylǵanyn jazǵan edik. Oǵan syılyq «Tán» romany úshin berildi.