Bıylǵy birinshi jartyjyldyqta elimizde 32 sport nysany paıdalanýǵa berildi
ASTANA. KAZINFORM – Prezıdenttiń tapsyrmalaryn oryndaý aıasynda Týrızm jáne sport mınıstrligi sport ınfraqurylymyn damytý baǵytyndaǵy iri jobalardy júıeli túrde júzege asyryp keledi. Jyl basynan beri elimizde 32 sport nysany iske qosyldy.
El ıgiligine berilgen nysandardyń ishinde erekshe atap óterlik joba – Aqmola oblysynyń Zerendi aýylynda salynǵan jańa sport kesheni. Bul – memleket menshigine qaıtarylǵan aktıvter esebinen tolyqtaı qarjylandyrylǵan elimizdegi alǵashqy sport nysany. Jalpy aýdany 6 myń sharshy metrden asatyn keshende erkin jáne qazaq kúresi, boks, aýyr atletıka, shańǵy sporty jáne jalpy dene daıyndyǵyna arnalǵan zaldar, kıim aýystyratyn bólmeler, medıtsınalyq kabınet, massaj jáne býfet bólmeleri, kir jýý orny, jattyqtyrýshylarǵa arnalǵan kabınetter, sondaı-aq 48 oryndyq jatyn oryn qarastyrylǵan.
Taǵy bir mańyzdy joba – Pavlodar oblysynyń Baıanaýyl aýdanyndaǵy kópsalaly sport kesheni. Munda voleıbol, basketbol, boks, kúres, sadaq atý, toǵyzqumalaq, ústel tennısi sııaqty sport túrlerimen aınalysýǵa bolady. Keshende 4 jolaqty (25 metrlik) júzý basseıni jumys isteıdi. 7 jastan asqan balalarǵa arnalǵan júzý úıirmeleri men olımpıadalyq jáne ulttyq sport túrleri boıynsha sektsııalar ashylǵan. Buǵan deıin aýdan turǵyndary 2009 jyly salynǵan eski sport zaldy paıdalanyp kelgen bolatyn. Jańa keshen zaman talabyna saı jabdyqtalyp, óńir halqynyń sportpen shuǵyldaný múmkindigin edáýir arttyrmaq.
Qyrkúıek aıynda Qyzylorda qalasynda halyqaralyq standarttarǵa saı jańa stadıonnyń qurylysy aıaqtalady dep josparlanyp otyr. Bul nysan tek kásibı sportshylarǵa ǵana emes, qala turǵyndaryna da qoljetimdi bolady. Munda boks, kúres, sporttyq gımnastıka, aýyr atletıka, taekvondo jáne fıtnes zaldary jumys isteıdi.
Bıyl Astanada Q.Muńaıtpasov atyndaǵy jańa stadıonnyń qurylysy bastaldy. Atalǵan nysandy 2026 jyldyń birinshi toqsanynda paıdalanýǵa berý josparlanyp otyr. Stadıonnyń qurylysy 15 myń sharshy metrden asatyn aýmaqty qamtıdy. Úsh qabatty keshen 3600 kórermenge arnalǵan. Jańa sport kesheninde jyl boıy jattyǵý ótkizýge bolady, qajetti kıim aýystyratyn jáne dýsh bólmelerimen tolyq jabdyqtalady.
Astanada Ulttyq sport ýnıversıtetiniń qurylysy júrip jatyr. Bul bilim ordasy kolledj deńgeıinen bastap doktorantýraǵa deıingi kezeńdi qamtıtyn mamandardy daıarlaýǵa baǵyttalǵan. Qurylys jumystary kezeń-kezeńimen júzege asyrylýda. Keshenniń qurylysy 2025 jyldyń sońynda aıaqtalady dep kútilýde.
Ýnıversıtet bazasynda 500 kolledj stýdenti, 2000-nan astam bakalavrıat, 60 magıstratýra jáne doktorantýra tyńdaýshylary bilim alady dep josparlanýda. Munda bolashaq jattyqtyrýshylar, sport menedjerleri, sport psıhologtary men ǵylymı qyzmetkerler joǵary jetistikter sporty boıynsha daıarlanady.
Ýnıversıtet ınfraqurylymyna stadıon, jabyq jeńil atletıka maneji, olımpıadalyq basseın, kópsalaly sport kesheni, sondaı-aq ǵylymı-zertteý jáne medıtsınalyq qalpyna keltirý ortalyqtary kiredi.
Sonymen qatar 2025 jyldyń sońyna deıin Túrkistan qalasynda eskek esýge arnalǵan arnanyń qurylysy aıaqtalady. Jańa arnada baıdarka men kanoe, para kanoe jáne akademııalyq eskek esý jarystaryn ótkizýge múmkindik bar.
Eske sala keteıik, buǵan deıin bıyldan bastap elimizde ulttyq sport olımpıadalyq sportpen bir deńgeıde bolatynyn habarlaǵan edik.