Bıylǵy birinshi toqsanda jalpy ishki ónim naqty 3 paıyzǵa ósti
ASTANA. KAZINFORM – Bıyl úsh aıda elde qurylys, kólik qyzmetteri jáne óńdeý ónerkásibi eń joǵary ósimdi kórsetti. Bul týraly Úkimet otyrysynda QR Ulttyq ekonomıka birinshi vıtse-mınıstri Azamat Ámrın málim etti.
- Bıylǵy birinshi toqsannyń qorytyndysy boıynsha jalpy ishki ónimniń naqty ósýi 3%-dy qurady. Osy jyldyń ereksheligi – qalyptasqan jaǵdaıǵa baılanysty ekonomıka munaı salasyn esepke almaǵanda ósip keledi. Naqty sektordaǵy ósý 2,1%-dy, kórsetiletin qyzmetterde 3,7%-dy qurady. Salalar arasynda qurylys, kólik qyzmetteri jáne óńdeý ónerkásibi eń joǵary ósimdi kórsetti. Saýda 4,8%-ǵa, baılanys qyzmetteri 3,9%-ǵa, aýyl sharýashylyǵy 3,4%-ǵa ósti. Investıtsııalar ósimniń draıveri retinde qalyp otyr, - dedi A.Ámrın.
Onyń aıtýynsha, negizgi kapıtalǵa salynǵan ınvestıtsııalar 6,4%-ǵa artyp, 3,5 trln teńgeni qurady. Onyń ishinde jeke ınvestıtsııalar 20,9%-ǵa ósti.
- Elektr energııasymen, gazben, býmen, ystyq sýmen jabdyqtaýǵa salynǵan ınvestıtsııalar kólemi 2,5 esege, aqparat jáne baılanysqa – 2 esege, aýyl sharýashylyǵyna – 70,6%-ǵa, saýdaǵa – 28,2%-ǵa, óńdeý ónerkásibine – 21,6%-ǵa, kólik qyzmetterine 7,9%-ǵa ósti. Investıtsııalardyń joǵary ósimi Jambyl, Túrkistan, Ulytaý, Almaty, Shyǵys Qazaqstan oblystarynda baıqaldy. Bul rette, Qostanaı, Jetisý, Mańǵystaý, Qaraǵandy oblystarynda jáne Shymkent qalasynda aıtarlyqtaı tómendeý baıqaldy, - dedi vıtse-mınıstr.
Budan buryn habarlanǵandaı, kúrdeli syrtqy ekonomıkalyq ahýalǵa qaramastan shıkizattyq emes sektor básekege qabilettiligin kórsetti.
