Bıylǵy birinshi toqsanda elimizdiń syrtqy saýda aınalymy 10,5 paıyzǵa artty
ASTANA. KAZINFORM - Qazaqstan bıylǵy jyldyń birinshi toqsanyn syrtqy saýda kórsetkishteriniń qarqyndy ósimimen qorytyndylady, dep habarlaıdy QR saýda jáne ıntegratsııa mınıstrliginiń baspasóz qyzmeti.
Baspasóz qyzmetiniń málimetterine qaraǵanda, iskerlik belsendilikti joǵary deńgeıde saqtap, eksporttyq áleýetti keńeıtý arqyly eldiń taýar aınalymy 32,9 mlrd AQSh dollaryna jetip, ótken jyldyń sáıkes kezeńimen salystyrǵanda 10,5%-ǵa artty.
2025 jyldyń birinshi toqsanynda bul kórsetkish 29,8 mlrd AQSh dollaryn quraǵan. Qalyptasqan oń dınamıka syrtqy ekonomıkalyq sektordyń turaqtylyǵyn jáne qazaqstandyq eksport qurylymynda joǵary qosylǵan quny bar ónimderdiń úlesi artyp kele jatqanyn kórsetedi.
2026 jylǵy qańtar–naýryz aılarynda eksport kólemi 9,4%-ǵa ósip, 18,0 mlrd AQSh dollaryn qurady. Al ımport kólemi 14,9 mlrd AQSh dollaryna jetip, 2025 jyldyń birinshi toqsanymen salystyrǵanda 11,8%-ǵa ulǵaıdy. Import ósimi negizinen ónerkásip, energetıka jáne kólik ınfraqurylymyn jańǵyrtýǵa qajetti ınvestıtsııalyq jáne tehnologııalyq taýarlardy satyp alý kóleminiń artýymen baılanysty. Ásirese elektr generatorlyq qondyrǵylar ımportynyń kólemi bes eseden astam ósip, 416,8 mln AQSh dollaryna jetti. Sonymen qatar gaz týrbınalary men avıatsııalyq qozǵaltqyshtar, munaı ónimderi, temirjol lokomotıvteri, sondaı-aq shıkizatty óńdeý men suryptaýǵa arnalǵan jabdyqtar ımporty aıtarlyqtaı artty.
-Mundaı qurylym ekonomıkadaǵy ınvestıtsııalyq suranystyń joǵary deńgeıde saqtalǵanyn jáne ınfraqurylymdyq ári ındýstrııalyq jobalardyń belsendi júzege asyrylyp jatqanyn kórsetedi,-delingen habarlamada.
Ulttyq ekonomıka mınıstrligi eldegi jalaqy ósimine qatysty túsinik berdi
