Bıylǵy birinshi toqsanda ana ólimi 43 paıyzǵa azaıdy – DSM
ASTANA. KAZINFORM - 2026 jyldyń birinshi toqsanynyń qorytyndysy boıynsha ótken jyldyń osy kezeńimen salystyrǵanda ana ólimi kórsetkishi 43%-ǵa tómendedi, Bul týraly Densaýlyq saqtaý mınıstrliginiń alqa otyrysynda birinshi vıtse-mınıstr Tımýr Sultanǵazıev málimdedi.
QR densaýlyq saqtaýdy damytý tujyrymdamasynyń iske asyrylý barysy týraly baıandamasynda ol negizgi baǵyttardyń biri – «Otbasy ál-aýqaty – jańa strategııalyq baǵdar» baǵytyna jan-jaqty toqtaldy.
Atalǵan baǵyt otbasyny, ana men balany qoldaýǵa, balanyń damýyna qaýipsiz ári qolaıly orta qalyptastyrýǵa baǵyttalǵan keshendi sharalar men maqsattardy aıqyndaıdy. Berilgen málimetterge sáıkes 2026 jyldyń alǵashqy úsh aıynyń qorytyndysy boıynsha ana ólimi kórsetkishi 100 myń tiri týǵan balaǵa shaqqanda 6,8-di qurady. Ótken jyly bul kórsetkish 12,0 bolǵan. Náreste ólimi de tómendep, 1000 tiri týǵan balaǵa shaqqanda 5,92-den 5,56-ǵa deıin azaıdy.
Analar densaýlyǵyn saqtaý salasyndaǵy oń dınamıka birqatar faktordy kúsheıtý nátıjesinde qol jetkizildi. Atap aıtqanda, júkti áıelderdi erte baqylaýmen qamtý deńgeıi 77,6%-ǵa deıin artty, al fertıldik jastaǵy áıelderdi pregravıdarlyq daıyndyqpen qamtý kórsetkishi 54,5%-ǵa jetti. 2025 jyldyń tamyz aıynan bastap Qazaqstanda «Analar saýlyǵy» baǵdarlamasy júzege asyrylyp keledi.
Baǵdarlama MSAK deńgeıinde 15 tegin bazalyq zertteýdi usynady jáne áıelderdiń habardarlyǵy men jaýapkershiligin arttyrýǵa baǵyttalǵan. Mınıstrliktiń tarapynan 17 óńirdegi 19 oblystyq perınataldyq ortalyqty jańǵyrtý boıynsha master-josparlar bekitildi. Bul qurylymdardy birizdendirýge jáne ozyq tehnologııalardy engizýge múmkindik beredi.
-Jańǵyrtý sheńberinde otbasyn josparlaýdan bastap bosanǵannan keıingi qalpyna keltirýge deıin áıelderge keshendi medıtsınalyq qyzmet kórsetý maqsatynda «Áıelder konsýltatsııalary» qaıta ashyldy. Qazirgi tańda olardyń 273-i qalalarda, 152-si aýyldyq jerlerde, 24-i oblystyq perınataldyq ortalyqtar janynda jumys isteıdi. Aldaǵy ýaqytta MSAK bazasynda qosymsha 49 áıelder konsýltatsııasyn ashý josparlanýda, – dedi birinshi vıtse-mınıstr.
Sonymen qatar ol óńirlerde 19 oblystyq perınataldyq ortalyq janynan «Salaýatty Ana» pansıonattary ashylǵanyn habarlady. Búginde munda 89 tósek uıymdastyrylyp, joǵary qaýip tobyndaǵy 3,5 myńnan astam júkti áıel aldyn ala medıtsınalyq kómek alǵan.
-Atalǵan sharalardy iske asyrý medıtsınalyq kómektiń sapasyn arttyrýǵa, júktilik kezindegi asqyný qaýipterin tómendetýge jáne ana men náreste ólimin odan ári azaıtýǵa múmkindik beredi,-delingen habarlamada.
Osyǵan deıin ana men bala densaýlyǵyna jáne perzenthanalar qashan zamana talabyna saı jańartylatynyna qatysty materıal jarııalady.
