Bıylǵy bes aıda Qazaqstan ekonomıkasy 6 paıyzǵa ósti - Prezıdent

ASTANA. KAZINFORM -  Memleket basshysy Sheteldik ınvestorlar keńesiniń 37-shi plenarlyq otyrysyn ótkizdi, dep habarlaıdy Aqordanyń baspasóz qyzmeti.

Qasym-Jomart Toqaev Sheteldik ınvestorlar keńesi memleket pen onyń halyqaralyq seriktesteri arasyndaǵy strategııalyq yqpaldastyqtyń senimdi platformasy retinde aldaǵy ýaqytta da qyzmet kórsete beretinin atap ótti.

– Atalǵan forým jıyrma jyldan astam ýaqyt boıy Qazaqstanda ınvestıtsııaǵa baǵdarlanǵan ekojúıe qalyptastyrýda mańyzdy ról atqaryp keledi. Biz Keńestiń belsendi qatysýymen elimizde ınvestıtsııalyq ahýaldy jaqsartýǵa, ashyqtyqty arttyrýǵa jáne kásipkerlik júrgizý sharttaryn jeńildetýge baǵyttalǵan keshendi reformalardy odan ári jalǵastyrýǵa nıettimiz, – dedi Memleket basshysy.

Prezıdenttiń aıtýynsha, sarapshylar taıaý jyldary jahandyq ІJÓ ósimi shamamen 2,9 paıyzǵa deıin baıaýlaıtynyn boljap otyr.

– Búginde ınflıatsııalyq qysymnyń kúsheıgeni, jahandyq jetkizý tizbegindegi kedergilerdiń jáne iskerlik ortadaǵy baǵdarsyzdyqtyń artqany baıqalady. Mundaı úrdister álem ekonomıkasynyń perspektıvasyn nasharlata túsýi yqtımal. Bul halyqaralyq syndarly dıalogtyń qajet ekenin kórsetedi. Qazaqstan sekildi elderdiń ekonomıkasy osyndaı syn-qaterler kezinde syrtqy daǵdarystarǵa tótep bere aldy. Bıylǵy bes aıda Qazaqstan ekonomıkasy 6 paıyzǵa ósti. Oǵan kólik jáne logıstıka, qurylys, saýda, taý-ken ónerkásibi jáne óńdeý salalary kóp úles qosty, – dedi Prezıdent.

Qasym-Jomart Toqaev Qazaqstannyń shıkizatty tereń óńdeý jáne jańa býyndaǵy ónerkásiptik óndiris qurý jolynda batyl qadam jasaǵanyna nazar aýdardy.

Memleket basshysy Qazaqstan temirjol salasyna arnalǵan mashına jasaý boıynsha Wabtec, Alstom jáne Stadler kompanııalarymen tabysty yntymaqtastyq ornatqanyn jetkizdi. Atap aıtqanda, Alstom kompanııasy elimizde servıstik ortalyqtar salyp, 2028 jyldan bastap lokomotıvterdiń jańa býynyn shyǵarýdy josparlap otyr. Wabtec kompanııasy balama otynmen júretin jyljymaly quramǵa 200 mıllıon dollar ınvestıtsııa quıdy. Al Stadler Rail kásiporny óndiristik qýaty jylyna 100 vagon shyǵaratyn zaýyt saldy.

Qasym-Jomart Toqaev Qazaqstannyń agroónerkásip kesheniniń joǵary áleýetine toqtaldy. Elimiz egistikke jáne jaıylymǵa jaramdy jer kólemi jaǵynan álemde altynshy oryndy ıelenedi, sondaı-aq astyq eksporty boıynsha jetekshi on memlekettiń qataryna kiredi. Memleket basshysy PepsiCo, Fufeng Group jáne Dalian Hesheng sııaqty sheteldik ınvestorlardyń tabysty qyzmetin mysalǵa keltirip, olardyń jergilikti ónimge turaqty suranys qalyptastyryp, ozyq tehnologııalardy engizip jatqanyn aıtty.

Osyǵan deıin Prezıdent qazaqstandyqtardy Sýdıa jáne sot qyzmetkeri kúnimen quttyqtaǵan bolatyn.