Bıylǵy bes aıda ekonomıka 3,7% ósken
ASTANA. KAZINFORM – Bıylǵy bes aıdyń qorytyndysy boıynsha el ekonomıkasynyń ósimi 3,7%-dy quraǵan. Bul týraly Premer-mınıstr Oljas Bektenovtiń Memleket basshysynyń ártaraptandyrýǵa basa nazar aýdara otyryp, ekonomıkanyń turaqty ósýin qamtamasyz etý týraly tapsyrmalaryn oryndaý máselesi boıynsha ótkizgen keńesi barysynda málim boldy, dep habarlaıdy QR Úkimetiniń baspasóz qyzmeti.
Aıta keteıik, jıyn barysynda ekonomıka salalaryn damytýdyń aǵymdaǵy kórsetkishteri qaraldy.
Premer-mınıstrdiń orynbasary – ulttyq ekonomıka mınıstri Serik Jumanǵarın, kólik mınıstri Nurlan Saýranbaev, energetıka mınıstri Erlan Aqkenjenov, ónerkásip jáne qurylys mınıstri Ersaıyn Naǵaspaev, aýyl sharýashylyǵy mınıstri Aıdarbek Saparov, qarjy mınıstri Mádı Takıevtiń baıandamalary tyńdaldy.
Ulttyq ekonomıka mınıstrliginiń málimetinshe, bes aıdyń qorytyndysy boıynsha ekonomıkanyń ósýi 3,7%-dy quraǵan. Óńdeý ónerkásibinde ósim – 9%. Mashına jasaýda óndiris kólemi 22,2%-ǵa ulǵaıdy. Qańtar-mamyr aılarynda elimizde 81 myńnan astam avtokólik quraldary jasaldy. Ósim hımııa ónerkásibinde 17,8%-ǵa jáne qurylys materıaldary óndirisinde 18,7%-ǵa qamtamasyz etildi. Aýyl sharýashylyǵynda naqty kólem ındeksi 103,6% boldy. Otyn-energetıka keshenine de nazar aýdaryldy.
Premer-mınıstr ınvestıtsııalyq jobalardy júzege asyrý, jańa óndiristerdi ýaqtyly iske qosý jáne qolda bar ósý rezervterin tıimdi paıdalaný jónindegi jumysty kúsheıtý qajettigin atap ótti.
Mınıstrlerge qajetti ósý qarqynyna qol jetkizý úshin barlyq sharalardy qabyldaý tapsyryldy. Oljas Bektenov jarty jyldyń qorytyndysy boıynsha naqty kólem ındeksiniń josparly kórsetkishterine qol jetkizý úshin memlekettik organdardyń birinshi basshylarynyń derbes jaýapkershiligin bekitti.
Osyǵan deıin Oljas Bektenov elimizdiń shıkizat modelinen tereń óńdeý ekonomıkasyna kóshýdi jedeldetetini týraly aıtqan bolatyn.
