Bıylǵy 1 toqsanda 631 dári-dármek túri boıynsha baǵa 24,6%-ǵa tómendegen
ASTANA. KAZINFORM – Bul týraly Premer-mınıstr Oljas Bektenovtiń Memleket basshysynyń otandyq farmatsevtıkalyq ónerkásipti damytý jónindegi tapsyrmalaryn júzege asyrý sheńberinde Otandyq kásipkerler ótkizgen keńesi barysynda málim boldy.
Otyrys barysynda Premer-mınıstr Oljas Bektenov otandyq densaýlyq saqtaý, farmatsevtıka jáne medıtsına ónerkásibin damytý halyqtyń ómir súrý sapasy men ulttyq ekonomıkanyń turaqtylyǵyna tikeleı áser etetinin atap ótti.
- Adamǵa baǵdarlanǵan memleket qaǵıdaty Prezıdentimiz Qasym-Jomart Kemeluly Toqaevtyń bastamasymen qabyldanǵan jańa Konstıtýtsııanyń negizgi ózegine aınaldy. ıAǵnı, adam kapıtalyn damytý memleket qyzmetiniń strategııalyq baǵyty retinde tanyldy ári ol Ata zańda naqty bekitildi. Bul, óz kezeginde otandyq densaýlyq saqtaý júıesin odan ári damytý úshin de tyń tásilderdi talap etedi, — dedi Oljas Bektenov.
«Atameken» UKP tóralqa tóraǵasy Qanat Sharlapaevtyń aıtýynsha, búginde elimizde 209 otandyq óndirýshi tirkelgen, onyń 43-i dárilik zattar óndirisimen, 166-sy medıtsınalyq buıymdar shyǵarýmen aınalysady. Qazirgi tańda 31 qazaqstandyq taýar óndirýshimen 2 myńnan astam farmatsevtıkalyq ónim túrin jetkizý boıynsha 83 uzaqmerzimdi shart jasalǵan. 2025 jylǵy jeltoqsannan beri 316,3 mlrd teńge bolatyn 6 ınvestıtsııalyq joba iske qosylyp, nátıjesinde 400-ge jýyq dárilik zat túrin shyǵarý, 1,1 myńnan astam jumys ornyn qurý jáne eksporttyq áleýetti keńeıtý kózdelgen.
Úkimettiń qoldaýymen ýákiletti organdarmen birlesip, baǵany kezeń-kezeńimen retteý boıynsha jumys júrgizilip jatyr. Búgingi tańda bul shara retseptsiz satylatyn 2,5 myńǵa jýyq dári-dármekti qamtydy, sondaı-aq quny 1 AEK-ke deıingi taǵy 1,8 myń retsept arqyly beriletin dári-dármek boıynsha ýaǵdalastyqqa qol jetkizildi. Medıtsınalyq jáne farmatsevtıkalyq baqylaý komıtetiniń taldaýyna sáıkes, bıylǵy 1 toqsanda 631 dári-dármek túri boıynsha baǵa orta eseppen 24,6%-ǵa tómendegen. Sondaı-aq dárilik zattar men medıtsınalyq buıymdardy «bir tereze» qaǵıdaty boıynsha tirkeýdi jedeldetý tetikteri pysyqtalý ústinde, bul olardyń naryqqa shyǵý merzimderin qysqartýǵa múmkindik beredi.
Dárilik zattardyń baǵasyn retteý máseleleri boıynsha farmatsevtıkalyq qyzmetti qoldaý jáne damytý qaýymdastyǵy túrindegi zańdy tulǵalar birlestiginiń basshysy Marına Dýrmanovanyń baıandamasy tyńdaldy.
Ulttyq statıstıka bıýrosynyń derekterine sáıkes, 2025 jyly elimizde farmatsevtıkalyq ónim óndirisiniń kólemi 191,1 mlrd teńgeni qurady, 2024 jylmen salystyrǵanda ósim 8,7%-ǵa artqan. Naryqtyq erekshelikterdi eskere otyryp, otandyq preparattarǵa baǵa belgileý júıesin jetildirýge qatysty usynystar aıtyldy.
«Eýrazııalyq medıtsınalyq qaýymdastyǵy» ZTB atqarýshy dırektory Sáýle Satybaeva TMKKK jáne MÁMS sheńberinde dári-dármek pen medıtsınalyq maqsattaǵy buıymdardy satyp alý máselesin kóterdi. Otandyq óndirýshilerge arnalǵan preferentsııalardy kúsheıtý jáne baǵa belgileý bóliginde uzaqmerzimdi sharttardyń turaqtylyǵyn arttyrý múmkindikterin qarastyrý usynyldy. Sondaı-aq otandyq óndiristiń bar ekenin eskere otyryp, dárilik zattardy halyqaralyq uıymdar arqyly satyp alý tetikteriniń ashyqtyǵyna erekshe nazar aýdaryldy.
Otandyq medıtsınalyq tehnıka óndirisin damytý boıynsha «Sintez-KZ medıtsınalyq holdıngi» JShS dırektory Igor Rybın usynystar aıtty. Atalǵan bastamalardyń qatarynda qazaqstandyq taýar óndirýshilermen uzaqmerzimdi sharttar jasasý praktıkasyn jańǵyrtý, ofteık–kelisimsharttardy engizý jáne QR-da akkredıttelgen synaq zerthanalaryn qurý bar.
Densaýlyq saqtaý mınıstri Aqmaral Álnazarova dári-dármekpen qamtamasyz etý júıesin reformalaý boıynsha júrgizilip jatqan jumystar týraly aıtyp, ashyqtyqqa, dári-dármek qunyn tómendetýge jáne tsıfrlyq tehnologııalardy engizýge basa nazar aýdarylyp otyrǵanyn atap ótti.
Uzaqmerzimdi sharttar boıynsha 5 myńnan astam pozıtsııa qaıta esepteldi jáne ótken jyldyń shildesinen bastap jańa baǵalar belgilendi. 2025 jyldyń qorytyndysy boıynsha qabyldanǵan sharalar esebinen biryńǵaı dıstrıbıýtordy satyp alý kezinde shamamen 75 mlrd teńge kóleminde bıýdjet qarajatyn únemdeýge qol jetkizildi.
Premer-mınıstr Oljas Bektenov farmatsevtıkalyq ónim óndirisin ulǵaıtý, tehnologııalar transferi, halyq úshin medıtsınalyq qyzmetterdiń qoljetimdiligi men sapasyn arttyrý baǵyttarynda memleket pen bıznestiń birlesken jumysynyń qajettiligine nazar aýdardy.
- Otandyq óndirýshilerdi qoldaý basymdyqqa ıe bolýy kerek jáne bul barlyq salaǵa qatysty. Biz barlyq baǵytta, sonyń ishinde medıtsınalyq tehnıka jáne dárilik zattarmen ózin-ózi qamtamasyz etý boıynsha jumys isteýimiz qajet. Bul – mańyzdy másele. Úkimet kásipkerlik qyzmetti retteý saıasaty aıasynda baqylaý jáne ákimshilik júktemeni azaıtý, sondaı-aq bıznestiń memlekettik qoldaý sharalaryna qoljetimdiligin keńeıtý jumystaryn jalǵastyrady. Óz kezeginde, bıznes tarapynan áleýmettik jaýapkershilikpen qatar, halyqtyń keń aýqymy úshin qoljetimdi baǵada qaýipsiz ári sapaly farmatsevtıkalyq ónimdermen qamtamasyz etý baǵytynda naqty qadamdar qajet, — dep atap ótti Oljas Bektenov.
Otyrys qorytyndysy boıynsha Premer-mınıstr memlekettik organdarǵa birqatar tapsyrma berdi:
Densaýlyq saqtaý mınıstrligine osy jyldyń 1 shildesine deıin «bir tereze» qaǵıdaty boıynsha dárilik zattar men medıtsınalyq buıymdardy tirkeýdi qamtamasyz etý tapsyryldy. Osy jyldyń 1 maýsymyna deıin kóterme jáne bólshek segmenttegi quny 1 aılyq eseptik kórsetkishke deıingi dárilik zattardyń baǵasyn deregýlıatsııalaý jumystaryn aıaqtaý qajet, al 1 aılyq eseptik kórsetkishten joǵary baǵalar boıynsha bıylǵy 1 jeltoqsanyna deıin aıaqtaý kerek.
Densaýlyq saqtaý mınıstrligine «Atameken» Ulttyq palatasymen jáne múddeli memlekettik organdarmen birlesip, baǵa belgileýdiń halyqaralyq tásilderin taldaý negizinde otandyq óndiristegi dárilik zattar men medıtsınalyq buıymdardyń ádil naryqtyq baǵasynyń teńgerimin qamtamasyz etý tapsyryldy.
Budan bólek, lokalızatsııalaý quraly jáne servıstik ınfraqurylym retinde medıtsınalyq tehnıkany jetkizýge uzaqmerzimdi sharttar jasasý tetigi boıynsha usynystar engizý.
- Ulttyq ekonomıka mınıstrligi múddeli memlekettik organdarmen birlesip, qosylǵan qun salyǵynyń biryńǵaı jeńildetilgen mólsherlemesin belgileý máselesin qarastyryp, dárilik zattar men medıtsınalyq buıymdardy ımporttaý jáne ótkizý kezinde salyq salý tásilderin birizdendirý boıynsha sharalar qabyldasyn,-delingen habarlamada.
Jıynǵa memlekettik organdardyń, «Atameken» UKPbasshylary, salalyq qaýymdastyqtar men bıznes ókilderi qatysty.
Osyǵan deıin DDU elimizge dárilik zattardyń aınalymyn retteý salasyn jetildirý boıynsha 3-shi deńgeı berilgenin rastaǵany týraly jazdyq.
