Bıyldan bastap JOO-ǵa túsý kezinde mektep túlekteriniń qoǵamdyq belsendiligi eskeriledi
ASTANA. KAZINFORM – Bıylǵa oqý jylynan bastap Qazaqstanda joǵary oqý oryndaryna túsý kezinde talapkerlerdiń qoǵamdyq belsendiligine, onyń ishinde volonterlik qyzmetine basymdyq berile bastaıdy. Bul týraly Astana qalasy Kommýnıkatsııalar qyzmetinde ótken baspasóz májilisinde qala ákimdiginiń «Astana jastary» KMM basshysy Shyńǵys Tileýlın aıtty.
Spıkerdiń aıtýynsha, volonterlik qyzmet jastardyń qarym-qatynas jasaý, komandada jumys isteý, jaýapkershilik sııaqty ómirlik daǵdylaryn damytýǵa múmkindik beredi. Sonymen qosa bıyldan bastap joǵary oqý ornyna túsý kezinde de volonterlik qyzmet talapkerdiń artyqshylyqtarynyń biri bolady.
– Jalpy sheteldik ýnıversıtetterge túsý kezinde talapkerlerdiń akademııalyq kórsetkishteri birdeı bolǵan jaǵdaıda olardyń mektep kezindegi qoǵamdyq belsendiligine nazar aýdarylady. Bıyldan bastap Qazaqstanda da osy tájirıbe engizilip jatyr. Volonterlikpen aınalysqan jastardyń joǵary oqý ornyna túsý múmkindigi arta túsedi, – dedi ol.
Sondaı-aq ol volonterlik jastardyń jumys tabýyna da oń áser etetinin tilge tıek etti.
– Bizde mektep oqýshylary men stýdentterdiń volonterlik qyzmetiniń arqasynda jumysqa ornalasqan mysaldar az emes. Jumys berýshiler olardyń jaýapkershiligin, bastamashyldyǵyn jáne tájirıbesin baǵalap, keıin qyzmetke qabyldap jatady. Bul – jastar úshin jaqsy kásibı mektep, - dedi Shyńǵys Tileýlın.
Óz kezeginde «Ulttyq volonterlik jeli» zańdy tulǵalar birlestiginiń atqarýshy dırektory Tatıana Mıronıýk jastarǵa volonterlik tájirıbesin túıindemede mindetti túrde kórsetýge keńes berdi.
– Kópshilik volonterlik qyzmetti jumys tájirıbesi retinde kórsetýge bolatynyn bile bermeıdi. Al búginde jumys berýshiler de, joǵary oqý oryndary da mundaı tájirıbege erekshe mán beredi. Sondyqtan tek alǵys hatpen shektelmeı, atqarylǵan volonterlik saǵattardyń sany kórsetilgen sertıfıkat alǵan jón. Mundaı qujattar halyqaralyq joǵary oqý oryndarynda da, Qazaqstanda da joǵary baǵalanady, – dedi ol.
Tatıana Mıronıýk te bıyldan bastap Qazaqstanda da talapkerlerdiń áleýmettik bastamalarǵa qatysýy men volonterlik qyzmeti joǵary oqý ornyna qabyldaý kezinde eskeriletin qosymsha artyqshylyqtardyń biri bolatynyn eske salyp ótti.
Aıta keteıik, elimizde volonterlikti qoldaýdyń jańa tujyrymdamasy ázirlenip jatyr.
Qujat eriktilik qozǵalysyn odan ári damytýdyń negizgi baǵyttaryn aıqyndap, salalyq volonterlikti kúsheıtýdi kózdeıdi.
