Bıyldan bastap tuqym qunyn sýbsıdııalaýdyń jańa mehanızmi engizildi
ASTANA. KAZINFORM – Otandyq tuqymdy satyp alǵan kezde sýbsıdııa kólemi 10%-ǵa joǵary bolady. Bul týraly Úkimet otyrysynda Aýyl sharýashylyǵy vıtse-mınıstri Azat Sultanov málim etti.
- Kóktemgi egis jumystaryn ýaqytyly ótkizý úshin jalpy 402 myń tonna jeńildetilgen baǵadaǵy dızel otyny bólindi. Búgingi tańda onyń 204,8 myń tonnasy jóneltildi. Tuqym materıalynyń sapasyna monıtorıng júrgizýge erekshe nazar aýdarylyp otyr. Tuqymǵa jalpy qajettilik 2,3 mln tonna. Tekserý qorytyndysy boıynsha olardyń barlyǵy egis standartynyń 1 jáne 2 synyptaryna sáıkes keledi. Tuqym sapasyn qamtamasyz etýde memlekettik qoldaý mańyzdy ról atqarady. Memleket basshysynyń tapsyrmasyna sáıkes, bıyldan bastap tuqym qunyn sýbsıdııalaýdyń jańa mehanızmi engizildi, - dedi A.Sultanov.
Atap aıtqanda, otandyq tuqymdy satyp alǵan kezde sýbsıdııa kólemi 10%-ǵa joǵary bolady. Bıýdjet shyǵysyn azaıtý jáne memlekettik qoldaý sharalaryn qysqartý maqsatynda bıyldan bastap tuqym sapasyn memlekettik qarajat esebinen tekserý toqtatyldy.
- Sharýalar tuqym sapasyn óz qarajaty esebinen tekserýi tıis jáne bul másele memlekettik qarjylandyrýdyń bolmaýyna baılanysty toqtamaýy qajet. Tuqym sharýashylyǵy salasyndaǵy baqylaýdy kúsheıtý maqsatynda QR Aýyl sharýashylyǵy mınıstrliginiń Memlekettik ınspektsııa komıteti qurylymynda tuqym sharýashylyǵy zańnamasynyń saqtalýyn baqylaý jónindegi jańa basqarma quryldy. Sonymen qatar jergilikti atqarýshy organdardyń astyq jáne asyl tuqymdy mal sharýashylyǵy ınspektorlarynyń qyzmetine de baqylaýdy kúsheıtý josparlanyp otyr. Bul ósimdik sharýashylyǵynyń negizgi baǵyttarynda baqylaýdy kúsheıtip, salany damytýǵa baǵyttalǵan memlekettik qoldaý sharalarynyń tıimdiligin arttyrýǵa múmkindik beredi, - dedi vıtse-mınıstr.
Budan buryn habarlanǵandaı, Aýyl sharýashylyǵy vıtse-mınıstri Azat Sultanov shegirtke zııankesterine qarsy hımııalyq óńdeý jumystary kórshi eldermen birlese júzege asatynyn aıtty.
