Bıyldan bastap óńirlerdegi ǵylymdy basqarý júıesi kúsheıtildi – Saıasat Nurbek

ASTANA. KAZINFORM – Búgin – ǵylym kúni. Aıtýly dataǵa oraı Ǵylym jáne joǵary bilim mınıstri Saıasat Nurbek ǵylym salasynda qolǵa alynǵan bastamalardy atap, sala mamandaryn kásibı merekesimen quttyqtady.

– Búgin – Qazaqstannyń ǵylym qyzmetkerleri kúni! Bul kúnniń 12 sáýirge belgilenýi tegin emes. Dál osy kúni elimizdiń ǵylymyn álemdik deńgeıge kótergen, kórnekti ǵalym, akademık Qanysh Imantaıuly Sátbaev dúnıege kelgen edi. Ol ulttyq ǵylymdy júıeli jolǵa qoıyp, irgeli zertteýlerdiń negizin qalady. Ǵylym – el damýynyń altyn dińgegi. Sondyqtan bul salany damytý – memlekettiń basym baǵyttarynyń biri. Prezıdent Qasym-Jomart Toqaev 2022 jyly Ǵylym akademııasynyń sessııasynda ǵylymnyń ekonomıkalyq ósimge áserin kúsheıtý, ony óndiris pen tehnologııamen ushtastyrý jóninde naqty tapsyrmalar berdi, - degen jazba qaldyrdy Saıasat Nurbek jelidegi paraqshasynda.

Mınıstrdiń aıtýynsha, búginde «Ǵylym jáne tehnologııalyq saıasat týraly» jańa Zańnyń negizin qalap, 2023 - 2029 jyldarǵa arnalǵan Joǵary bilim men ǵylymdy damytý tujyrymdamasy aıasynda júzege asyrylyp, ǵylym salasynda aýqymdy ózgerister bolyp jatyr.

Bıyldan bastap óńirlik ǵylymdy damytýǵa erekshe mán beriledi. Jergilikti atqarýshy organdar ǵylymı-tehnologııalyq saıasatqa tikeleı qatysa bastaıdy.

– Memleket jas ǵalymdarǵa jan-jaqty qoldaý kórsetip otyr. Olar úshin granttyq qarjylandyrý, sheteldik taǵylymdamalar, mega-granttar, ǵylymı dáreje úshin qosymsha tólemder, tipti turǵyn úımen qamtamasyz etý sııaqty áleýmettik qoldaý tetikteri iske qosyldy. Sońǵy 2 jylda jas ǵalymdarǵa 423 páter berildi. Jyl saıyn 50 «Úzdik ǵylymı qyzmetker» syılyǵy tabystalady. Daryndy jas zertteýshilerge taǵy 50 arnaıy stıpendııa bólinedi. Búgingi ǵylym – tek zertteý emes, ol – ekonomıkanyń qozǵaýshy kúshi. Sondyqtan biz ǵylymı ázirlemelerdi kommertsııalandyrýǵa erekshe mán berip otyrmyz. Qazirgi ýaqytta 208 ǵylymı joba iske asyrylyp jatyr. Onyń 25-i eksportqa shyqty. Al 6 joba – 1 mıllıard teńgeden astam satylymǵa qol jetkizdi. Jalpy alǵanda, kommertsııalanǵan jobalardyń el ekonomıkasyna qosqan úlesi – 118,4 mıllıard teńge. Bıyldan bastap óńirlerdegi ǵylymı basqarý júıesi kúsheıtildi, - deıdi vedomstvo basshysy.

Sondaı-aq S.Nurbek qazir óńir ákimdikteri janynan ǵylym jónindegi keńester qurylyp, Qaraǵandy, Soltústik Qazaqstan jáne Túrkistan oblystary óńirlik granttyq baǵdarlamalar men ǵylymı sessııalarǵa belsendi qatysa bastady. 2024 - 2026 jyldary óńirlerde zertteýshilik artyqshylyq ortalyqtaryn qurý úshin 17 baǵdarlama engiziledi.

- Qadirli áriptester! Qazaqstan ǵylymynyń altyn qazyǵyn ustap turǵan ǵalymdarǵa, zertteýshilerge, oqytýshylarǵa shynaıy alǵysymdy bildiremin. Sizderdiń eren eńbekterińiz – eldiń erteńine salynǵan berik negiz, - dep quttyqtady Ǵylym mınıstri.

Aıta keteıik, 10 sáýirde Prezıdent Qasym-Jomart Toqaev el ǵalymdarymen basqosýda Táýelsizdiktiń alǵashqy jyldarynda ǵylymǵa basa mán berilmegenin eske saldy. Sondaı-aq Memleket basshysy ǵylym salasynda jemqorlyq faktileriniń kóbeıip ketkenin aıtty. 

Buǵan deıin nege zaýyttar ǵalymdardyń ashqan jańalyǵyn paıdalanýǵa asyqpaıdy degen taqyrypqa sholý jasaǵan edik.