Bıyldan bastap medıtsına salasynda aqyly oqý qıyndaıdy

ASTANA. KAZINFORM — Memleket tarapynan dárigerlerge tapsyrys kóbeıgen. Máselen, bıyl elimizde 10 530 dáriger daıarlandy. Onyń 4 900-i — memlekettik grant boıynsha, qalǵandary — aqyly túrde bilim alǵan.

— Aldaǵy ýaqytta aqyly bólimderdegi oqý oryndarynyń sany qysqarýy múmkin. Sebebi medıtsınalyq joǵary oqý oryndary stýdentterdi belgili bir talaptar men tártipke saı qabyldaýy tıis. Dárigerlerdi sapaly daıarlaý úshin qajetti ınfraqurylym, oqytý bazasy, jetkilikti sany bar bilikti oqytýshylar quramy, oqý quraldary men baǵdarlamalar bolýy mindetti. Eger stýdentter sany shekten tys kóbeıse, bul bilim sapasynyń tómendeýine alyp keledi. Osyǵan baılanysty qazirgi tańda aqyly túrde oqytylatyn stýdentter sanyn qysqartý qolǵa alyndy. Máselen, bıyldyń ózinde birneshe medıtsınalyq JOO-da aqyly oqýǵa qabyldaý deńgeıi tómendetildi, — deıdi QR DSM Ǵylym jáne adamı resýrstar departamenti dırektorynyń orynbasary Ulmıra Nuralıeva.

Aıta keteıik, densaýlyq saqtaý mınıstrligi medıtsınalyq joǵary oqý oryndaryna túsetinderge qoıylatyn talaptardy kúsheıtti.