Bıyldan bastap Qazaqstanda jańartylǵan salyqtyq shegerimder júıesi engizildi
ASTANA. KAZINFORM — Qazaqstanda 2026 jyldan bastap jańartylǵan salyqtyq shegerimder júıesi engizildi, ol azamattarǵa jeke tabys salyǵy somasyn azaıtýǵa múmkindik beredi. Onyń barysy týraly Astana qalasynyń Memlekettik kirister departamenti málim etti. Bul týraly Astana qalasynyń ákimdigi jazdy.
Zańnamaǵa sáıkes, jeke tulǵalar jeke tabys salyǵy boıynsha salyq salý obektisin aıqyndaý kezinde birqatar salyqtyq shegerimderdi qoldanýǵa quqyly.
Mynadaı shegerim túrleri qarastyrylǵan:
- áleýmettik tólemderdiń salyqtyq shegerimi;
- bazalyq salyqtyq shegerim;
- áleýmettik salyqtyq shegerimder;
Áleýmettik tólemder boıynsha salyqtyq shegerim Qazaqstan Respýblıkasynyń zańnamasyna sáıkes eseptelgen mindetti zeınetaqy jarnalaryn, mindetti áleýmettik medıtsınalyq saqtandyrý jarnalaryn, azamattyq-quqyqtyq sıpattaǵy sharttar boıynsha jeke tulǵalardyń kiristerinen ustalatyn áleýmettik aýdarymdardy qamtıdy.
— Bazalyq salyqtyq shegerim — árbir kúntizbelik aı úshin qoldanylatyn tıisti qarjy jylynyń 1 qańtaryna qoldanysta bolatyn aılyq eseptik kórsetkishtiń 30 eselengen mólsherin quraıdy. Jyldyq mánde mundaı shegerimniń mólsheri 360 AEK-ten aspaýǵa tıis, — delingen habarlamada.
Áleýmettik salyqtyq shegerimder:
• І-ІІ top múgedektigi bar adamdarǵa — jylyna 5 000 AEK.
• ІІІ top múgedektigi bar adamdarǵa, múgedektigi bar balalarǵa, soǵysqa qatysýshylarǵa jáne olarǵa teńestirilgen tulǵalarǵa — 882 AEK.
• Múgedektigi bar balaǵa nemese bala kezinen múgedektigi bar adamǵa qamqorlyq jasaıtyn ata-anaǵa (qorǵanshyǵa), sondaı-aq asyrap alýshylarǵa — 882 AEK.
Shekteýler: salyqtyq shegerimder tıisti bilim berý, medıtsınalyq uıymdar, halyqqa áleýmettik qorǵaý uıymdarynyń qyzmetkerlerine, sondaı-aq jumys qatynastary sebepti qamqorshylyqtaǵy jáne qamqorshy tulǵalarǵa jáne asyrap alynǵan balanyń ata-anasymen nekege turǵan tulǵalarǵa qoldanylmaıdy.
Áleýmettik salyqtyq shegerimder osy salyqtyq shegerimderdi qoldaný úshin negiz týyndaǵan, bar nemese bolǵan kúntizbelik jylda qoldanylady.
Shegerimderdi qoldaný tártibi:
• salyq agenti (jumys berýshi) arqyly;
• salyq agentinde qoldanbaǵan kezde salyqtyq shegerimderdi ózi derbes qoldanady.
Astana qalasy MKD eske salady, salyqtyq shegerimderdi qoldaný tek rastaıtyn qujattardyń bolýy jáne zańnamada belgilengen qoldaný tártibin saqtaý kezinde múmkin.
Aıta keteıik, astanalyqtardyń salyq bereshegi 3 mıllıard teńgeden asty.
