Bıyldan bastap elimizde ulttyq sport olımpıadalyq sportpen bir deńgeıde bolady
ASTANA. KAZINFORM — Ulttyq sport túrleri — Qazaqstannyń mádenı kodynyń mańyzdy bóligi ári memlekettik saıasattyń basym baǵyttarynyń biri. Bıyl maýsym aıynda kúshine engen «Dene shynyqtyrý jáne sport týraly» zańnyń jańa redaktsııasynda ulttyq sport túrleri olımpıadalyq jáne paralımpıadalyq sport túrlerimen bir deńgeıde basym baǵyttar qataryna engizildi. Bul týraly Týrızm jáne sport mınıstrligi málimdedi.
Bul ulttyq sportty maqsatty túrde qarjylandyrýǵa jáne ony joǵary jetistikter sporty retinde tanýǵa jol ashady.
2025 jylǵy 14 naýryzda ótken Ulttyq quryltaıdyń IV otyrysynda Memleket basshysy «Ulttyq sport — mádenı biregeıligimizdiń ajyramas bóligi jáne ult saýlyǵyn tárbıeleýdegi mańyzdy qural», — dep atap ótken edi.
Búginde elimizde 11 ulttyq sport túri belsendi damyp keledi: asyq atý, aýdaryspaq, báıge, dástúrli sadaq atý, jamby atý, jekpe-jek, kókpar, qazaq kúresi, qusbegilik, teńge ilý jáne toǵyzqumalaq. Onyń tórteýi ıÝNESKO-nyń materıaldyq emes mádenı muralar tizimine engen (qusbegilik, toǵyzqumalaq, qazaq kúresi jáne asyq atý).
2024 jyldyń qyrkúıek aıynda Astanada V Dúnıejúzilik kóshpendiler oıyny ótti. Bul dúbirli dodaǵa 89 elden 2700 sportshy qatysty. Otandastarymyz 112 medal, onyń ishinde 43 altyn medal jeńip alyp, jalpykomandalyq esepte birinshi oryn ıelendi. Sondaı-aq jyl saıyn elimizde mynadaı sporttyq is-sharalar ótkiziledi:
«Aqbıdaı» – aýyl sport oıyndary
«Qazaqstan Barysy» – respýblıkalyq týrnır
«Uly dala joryǵy» – marafon-báıge
El kóleminde túrli etnosport festıvalderi men chempıonattar
Ulttyq sport – patrıotızmniń, urpaq sabaqtastyǵynyń jáne týǵan jerge degen súıispenshiliktiń aıqyn kórinisi.
Aıta keteıik, Qazaqstanda ulttyq sport túrlerinen kásibı bapkerler daıyndalyp jatyr.
2024 jyldyń qorytyndysy boıynsha ulttyq sport túrlerimen turaqty túrde aınalysatyn qazaqstandyqtardyń sany 660 myńnan asty.