Bıyl joldardy jóndeýge 781 mıllıard teńge qarastyrylǵan — «QazAvtoJol»

ASTANA. KAZINFORM — Bıyl 8 800 shaqyrym jolda túrli jóndeý jumystary júrgiziledi. Bul týraly «QazAvtoJol» UK» AQ basqarma tóraǵasy Darhan Imanashev aıtty.

— Bıyl elimizdiń kólik ınfraqurylymynyń mańyzdy baǵyttaryn qamtıtyn aýqymdy jol-qurylys maýsymy bastalady. Jol salasyn jańǵyrtý maqsatynda 8 800 shaqyrym avtomobıl joldarynda túrli jóndeý jumystary júrgizilmek, — dedi ol Ortalyq kommýnıkatsııalar qyzmetindegi brıfıngte. 

Onyń ishinde:

• 2100 shaqyrymda qurylys jáne qaıta jańartý;
• 460 shaqyrymda kúrdeli jóndeý;
• 6300 shaqyrymda ortasha jóndeý jumystary.

— Josparlanǵan jumystardy oryndaýǵa shamamen 10 000 birlik jol-qurylys tehnıkasy, 27 asfaltbeton zaýyty jáne 25 myń maman jumyldyrylatyn bolady. Jobalardy iske asyrý barysynda 9,4 mıllıon tonna asfaltbeton qospasy, 12 mıllıon tekshe metr qıyrshyq tas jáne 500 000 tonna bıtým qoldaný josparlanǵan. Barlyq jobalardy júzege asyrý úshin shamamen 781 mıllıard teńge kóleminde qarjy qarastyrylǵan, — dedi Darhan Imanashev.

Buǵan deıin bıyl «Jezqazǵan — Qaraǵandy», «Saryaǵash q. aınalma joly», «Rýdnyı q. aınalma joly», «Aqtóbe — Ulǵaısyn», «Qyzylorda q. aınalma joly», «Túrkistan q. aınalma joly», «Beıneý — Bozoı — Shalqar» jáne «Qyzylorda — Sekseýil» mańyzdy jobalarynyń qurylysyna erekshe kóńil bólinetindigin jazǵan edik.