Bıyl jylý men elektr jelilerin jańǵyrtýǵa 627 mlrd teńgege jýyq qarjy bólindi — Energetıka mınıstrligi
ASTANA. KAZINFORM — Bıyl 130 shaqyrym jylý jelisi men 10 490 shaqyrym elektr jelisi jańǵyrtylady. Bul týraly Úkimet otyrysynda Energetıka vıtse-mınıstri Suńǵat Esimhanov aıtty.
— Memleket basshysynyń tapsyrmasy boıynsha mınıstrlik basqa da múddeli organdarmen birlesip, Energetıkalyq jáne kommýnaldyq sektorlardy jańǵyrtýdyń ulttyq jobasyn iske asyrýdy qamtamasyz etedi. Bıyl ulttyq jobamen jalpy somasy 626,8 mlrd teńgege 130 shaqyrym jylý jelisin jáne 10 490 shaqyrym elektr jelisin jańǵyrtý kózdelgen. Negizgi mindet — jelilerdegi shyǵyndar men tozýdy azaıtý, sondaı-aq otandyq taýar óndirýshilerdi qoldaý, — dedi Suńǵat Esimhanov.
Onyń aıtýynsha, I kezeńde jylýmen jáne elektrmen jabdyqtaý júıeleriniń turaqty jumysy úshin óńirlerdiń ótinimderi boıynsha Úkimet rezervinen 7 aımaqqa 25,4 mlrd teńge bólý josparlanyp otyr. Qazirgi ýaqytta Shyǵys Qazaqstan oblysy, Jetisý, Abaı oblystaryna qarajat bólý týraly qaýlylar qabyldandy. Qalǵan óńirlerge jýyq arada bólinedi.
— Mysaly, Memleket basshysynyń tapsyrmasymen Jetisý oblysynyń Taldyqorǵan qalasyndaǵy Ońtústik-Batys turǵyn aýdanynda qazandyqtyń qurylysy júrgizilip jatyr. Shyǵys Qazaqstan oblysynda Rıdder JEO-da № 5 jáne 6 qazandyqtarǵa jáne Rıdder qalasyndaǵy jylý jelileriniń 12 ýchaskesine jóndeý jumystary júrgizilýde. Abaı oblysynda 1-JEO men Semeı qalasynyń qazandyqtary jóndelip jatyr. Aldaǵy jylytý maýsymynyń turaqty ótýi úshin mınıstrlik barlyq tehnıkalyq jáne uıymdastyrýshylyq is-sharanyń oryndalýyn uıymdastyrady. Energetıkalyq qadaǵalaý komıteti is-sharalardyń oryndalýyn qatań qadaǵalaıdy, — dedi vıtse-mınıstr.
Buǵan deıin elimizdegi 5 jylý elektr ortalyǵy bıyl «qyzyl» aımaqtan shyǵarylatynyn jazǵan edik.
