UQK jyl basynan beri «qara naryqtan» quny 17 mlrd teńge bolatyn esirtki tárkilegen
ASTANA. KAZINFORM – 1987 jyly 26 maýsymda Birikken Ulttar Uıymy halyqaralyq nashaqorlyqqa jáne esirtkiniń zańsyz aınalymyna qarsy kúres kúni dep jarııalady. QR Ulttyq qaýipsizdik komıteti basqa memlekettik organdarmen qatar osy qaterlerge qarsy is-qımylǵa belsendi qatysady.
2024 jyldyń basynan beri UQK esirtkiniń zańsyz aınalymyna qarsy is-qımyl boıynsha 96 operatsııa, onyń ishinde 23-i shet memleketterdiń quzyretti organdarymen júrgizdi. Nátıjesinde 24 halyqaralyq jáne 17 aımaqtyq esirtki jetkizý arnalary, sondaı-aq 16 jasyryn esirtki zerthanasynyń qyzmeti joıyldy. Zańsyz aınalymnan 1,3 tonnadan astam esirtki quraldary men psıhotroptyq zattar, 4.6 tonna kóknár sabanynyń shıkizaty jáne sıntetıkalyq esirtki jasaý úshin paıdalanylatyn 13,6 tonna hımııalyq reagentter alyndy.
«Qara naryqta» alynǵan esirtkiniń quny shamamen 17 mlrd teńgege baǵalanady. Al aınalymǵa jiberilgen kólem shamamen 5 mln bir rettik doza. UQK derekteri boıynsha Qazaqstannyń 54 azamaty men sheteldikterge qatysty sotqa deıingi tergeýler júrgizilip jatyr.
Sonymen qatar UQK Shekara qyzmeti halyqaralyq qatynas joldarynda esirtki quraldaryn tasymaldaýdyń 200-den astam áreketiniń jolyn kesti. Zańsyz aınalymnan 790 kg astam esirtki jáne psıhotroptyq zattar alyndy.
Osy baǵyttaǵy is-sharalar jalǵasyp jatyr.
