Bıyl Jetisý oblysynda 11 balanyń ómiri jolda qıyldy

TALDYQORǴAN. KAZINFORM - Jetisý oblystyq polıtsııa departamenti jyl basynan beri óńirde 700-ge jýyq kólik oqıǵasy bolǵanyn málimdedi. Qara joldyń ústinde 119 adam qaza bolǵan.

Óńir boıynsha jol-kólik oqıǵasynyń kórsetkishi kóńil qýantpaı tur. Ótken jyldyń 11 aıynda 457 jaǵdaı tirkelse, bıyl jyl basynan beri 700-ge jýyqtaǵan. Onyń 340-y boıynsha qylmystyq is qozǵalǵan.

Kámeletke tolmaǵandardyń qatysýymen bolǵan 290 apatta 11 bala qaıtys bolyp, 279-y jaraqat alǵan.

Zardap shekken balalardyń jartysynan kóbi jolaýshy bolǵan.

- Jol kólik oqıǵasynyń negizgi sebepteri – jol qozǵalysy erejelerin buzý jáne onyń 90% júrgizýshilerdiń kinásinen bolady. Olardyń ishinde jyldamdyqtyń artýy, qarsy jolaqqa shyǵý, manevr jasaý qatelikteri, sondaı-aq jaıaý júrginshiler men skýter jáne samokat júrgizýshileri tarapynan buzýshylyqtar bar,- dedi Jetisý oblystyq polıtsııa departamenti anyqtaý basqarmasynyń anyqtaýshysy Ádilet Myńbaev.

Polıtsııa qyzmetkerleri kisi ólimimen aıaqtalǵan jol-kólik oqıǵasy úshin QR QK 345-babynda 10 jylǵa deıin bas bostandyǵynan aıyrý jazasy qarastyrylǵanyn jáne júrgizýshilerge jol erejesin qatań saqtaýdy eskertedi.

Eske salaıyq, osyǵan deıin Jetisý oblysynda kólik apatynan 2 adamnyń qaıtys bolǵanyn jazǵanbyz.