Bıyl Jetisý oblysynda 103 myńǵa jýyq bala jazǵy saýyqtyrý lagerlerimen qamtylady
TALDYQORǴAN. KAZINFORM – Oblystyq bilim basqarmasynyń sózinshe, óńirde qala syrtyndaǵy 10 lagerdiń 9-y jumys isteıdi. Onda oblystaǵy 1-10 synyp oqýshylary ýaqyttaryn tıimdi ótkizbek.
103 myń balanyń 8 277-si – áleýmettik osal otbasynan shyqqan jetkinshekter. Olar jergilikti bıýdjetten qarjylandyrylatyn qala syrtyndaǵy lagerlerge ornalastyrylmaq. Al, 93 223-si mektep janyndaǵy tamaqtandyrylmaıtyn ortalyqta, 1 200-i Tekeli qalasyndaǵy sporttyq lagerde demalady.
«19 820 bala týrıstik saıahattarmen, 18 998 bala ıntellektýaldy shyńdaýmen, 46 507 oqýshy eńbekpen, 32 700 bala shyǵarmashylyq úıirmelermen qamtylady. Oǵan qosa respýblıkalyq bıýdjet qarajaty men «Qazaqstan halqyna» qorynyń esebinen de balalar demalysy uıymdastyrylady», - dep atap ótti Jetisý oblystyq bilim basqarmasynyń baspasóz qyzmeti.
Al, Eskeldi aýdanynda ornalasqan «Aınalaıyn» balalar úıiniń lagerine kúrdeli jóndeý jumystary bastaldy. Keler jyly demalys aımaǵy búldirshinderge esigin aıqara ashady dep josparlanyp otyr.
