Bıyl jergilikti ekojúıeni saqtaý úshin 2,5 mlrd tekshe metr sý jiberilmek

ASTANA. KAZINFORM — Sý resýrstary jáne ırrıgatsııa mınıstrligi qorshaǵan ortany qorǵaýǵa 2,5 mlrd tekshe metr sý jiberedi.

2024 jyly osy maqsatta 1,5 mlrd tekshe metr sý jiberildi. Mysaly, Qyzylorda oblysynyń kólder júıesin saqtaýǵa 889 mln tekshe metr, Pavlodar oblysynyń Shiderti ózeniniń saǵalaryna 87,5 mln tekshe metr, Teńiz–Qorǵaljyn memlekettik qoryǵynyń kólderiniń ekologııalyq jaǵdaıyn jaqsartý úshin Nura ózenine 29,7 mln tekshe metr sý jiberildi.

Aqtóbe oblysynyń Elek ózenine 90 mln tekshe metr sý jiberildi. Túrkistan oblysynyń sý sharýashylyǵy nysandarynan 144 mln tekshe metr, al D.Qonaev atyndaǵy Úlken Almaty kanaly «Qazsýshar» fılıalynyń nysandarynan 133 mln tekshe metr sý jiberildi.

— Bizdiń mınıstrlik 219 kóldi sýǵa toltyrýdy, 204,2 myń gektardan astam shabyndyq alqap pen 5,23 myń gektar ormandy jerdi sýmen qamtamasyz etýdi josparlap otyr. Bul sý kózderine jaqyn ornalasqan aýdandardaǵy ekologııalyq jaǵdaıdy jáne sýmen jabdyqtaýdy jaqsartady. Barlyq is-sharalardy júzege asyrý qurǵaqshylyq qaýpin azaıtýǵa, jem-shóp alqaptarynyń sapasyn jaqsartýǵa, aýyl sharýashylyǵy men jergilikti ekojúıeniń turaqty damýyna tıimdi yqpal etedi, — dedi Sý sharýashylyǵy ımarattaryn damytý departamentiniń dırektory Qudaıbergen Qorǵanbaev.

Osyǵan deıin elimizdegi sý resýrstary boıynsha aqparattyq júıe ázirlenetini aıtyldy.