Bıyl jer qoınaýyn paıdalanýshylarmen 901 mlrd teńgege 551 kelisimshart jasaldy — Úkimet

ASTANA. KAZINFORM — «Samuryq-Qazyna» qory OTÓ-den satyp alýdy ulǵaıtpaq. 2025 jyly jer qoınaýyn paıdalanýshylarmen 901 mlrd teńgege 551 kelisimshart jasaldy. Bul týraly Úkimet málim etti.

«Samuryq-Qazyna» qory elimizdiń ónerkásiptik damýy aıasynda otandyq taýaróndirýshilerdi qoldaý tetikterin jetildirýdi jáne satyp alý kólemin ulǵaıtýdy jalǵastyryp otyr.

2024 jyly Qordyń enshiles kompanııalary 537,4 mlrd teńgege 287 kelisimshart jasady, bul 2023 jylǵy kórsetkishten shamamen úsh ese artyq. 2025 jyldyń qańtar-maýsym aılarynda jalpy somasy 230,3 mlrd teńgege 417 kelisimshart rásimdeldi. 

Elimizdiń ónerkásiptik áleýetiniń negizgi sektorlarynyń biri sanalatyn jer qoınaýyn paıdalaný salasy da aıtarlyqtaı nátıjeler kórsetti: 2024 jyly 138,9 mlrd teńgege 290 kelisimshart jasaldy — 2023 jylmen salystyrǵanda 2,6 ese kóp, al 2025 jyldyń alǵashqy alty aıynda 901,4 mlrd teńgege 551 kelisimshartqa qol qoıyldy.

Jalpy, jer qoınaýyn paıdalanýshylar men júıe quraýshy kásiporyndardyń satyp alýlarynyń úlesi jalpy kólemniń 40%-nan asady. Bul kórsetkish Prezıdenttiń iri bıznesti ındýstrııalyq damýǵa tartýǵa jasaǵan basym baǵytyn aıqyn kórsetedi.

Eske sala keteıik, buǵan deıin Úkimet otandyq taýar óndirýshiler men shaǵyn bıznesti qoldaýdy keńeıte túsetinin jazǵan edik.