Bıyl jer qoınaýyn paıdalanýshylarmen 17 kelisimshart buzyldy
ASTANA. KAZINFORM — Bıyl jer qoınaýyn paıdalanýshylarmen 17 kelisimshart buzyldy. Bul týraly Úkimet otyrysynda Energetıka vıtse-mınıstri Qaıyrhan Tutqyshbaev aıtty.
— Jyl saıynǵy monıtorıng nátıjesinde 2024 jyldyń qorytyndysy boıynsha jer qoınaýyn paıdalanýshylardyń atyna jalpy somasy shamamen 19 mlrd teńgege kelisimsharttyq mindettemelerdi buzý týraly 167 habarlama joldandy. Búgingi tańda memlekettik bıýdjetke shamamen 2 mlrd teńge óteldi. Bul jumys mınıstrliktiń turaqty baqylaýynda. Mınıstrlik qabyldanǵan kelisimsharttyq mindettemelerdi oryndamaı uzaq ýaqyt ustalatyn jer qoınaýy ýchaskelerin tekserý jónindegi Memleket basshysynyń tapsyrmasyn oryndaý aıasynda osy jyly 17 kelisimshartty buzdy, — dedi vıtse-mınıstr.
Onyń aıtýynsha, memleketke qaıtarylǵan jer qoınaýynyń ýchaskeleri ınvestıtsııalar tartý úshin aýktsıonǵa qoıylady.
— Memleket basshysynyń jańa óndirister qurý jáne munaı-gaz jobalaryndaǵy qazaqstandyq taýarlardyń, jumystar men kórsetiletin qyzmetterdiń úlesin ulǵaıtý jónindegi tapsyrmasy aıasynda mınıstrlik elishilik qundylyqty damytý jóninde turaqty sharalar qabyldap jatyr. Jer qoınaýyn paıdalanýdyń biryńǵaı memlekettik júıesin paıdalana otyryp, mınıstrlik jer qoınaýyn paıdalanýshylardyń satyp alynatyn taýarlardaǵy, jumystardaǵy jáne kórsetiletin qyzmetterdegi jergilikti qamtý týraly esepterin únemi taldaıdy. Taldaý nátıjeleri boıynsha otandyq óndirýshilerdiń úlesin ulǵaıtý jáne olardyń odan ári damýyn qoldaý úshin sharalar qabyldanyp jatyr. Bul jumystyń nátıjesi bıyl iri operatorlar men otandyq taýar óndirýshiler arasynda jalpy somasy 467,3 mln dollar bolatyn 40 kelisimshartqa qol qoıý boldy. Osy baǵyttaǵy jumys jalǵasyp jatyr, — dedi ol.
Aıta keteıik, Úkimet otyrysynda geologııa jáne jer qoınaýyn paıdalaný salasyn damytý, tsıfrlandyrý sharalary, sonymen qatar halyqty dári-dármekpen qamtamasyz etý máselesi pysyqtaldy.