Bıyl jer qoınaýyn paıdalanýshylar 4,3 trln teńge ınvestıtsııa quıdy

ASTANA. KAZINFORM – Bıyl 9 aıda jer qoınaýyn paıdalanýshylar 4,3 trln teńge ınvestıtsııa quıdy. Bul týraly Úkimet otyrysynda Energetıka vıtse-mınıstri Erlan Aqkenjenov aıtty.

- Ken oryndaryn tezirek ıgerýge tartý maqsatynda bir kelisimshart boıynsha barlaýdan baǵalaýǵa, al 10 kelisimshart boıynsha barlaýdan óndirýge kóshý júzege asyryldy. Bıyl eki elektrondy aýktsıon ótkizildi, olardyń barysynda 15 ýchaske satyldy. Qol qoıý bonýsynyń túpkilikti kólemi 32,7 mlrd teńgeni qurady, onyń ishinde búgingi tańda bıýdjetke 9,1 mlrd teńge tústi. Geologııalyq barlaýǵa salynǵan ınvestıtsııa kólemi 82,5 mln dollardy qurady. Sondaı-aq, 56 izdeý jumystarynyń jobasy eskertý tártibinde tapsyrylyp, olardy jer qoınaýyn paıdalanýshylar ózderi bekitti, - dedi ol.

Onyń atap ótýinshe, bul árbir jerqoınaýyn paıdalanýshyǵa jobalaý qujattaryn memlekettik saraptamadan ótkizýge ketetin eki aı ýaqytty únemdeýdi, dalalyq jumystardy jyldam bastaýǵa múmkindik berdi.

- Osy jyldyń 9 aıynda jer qoınaýyn paıdalanýshylar tarapynan 4,3 trln teńge ınvestıtsııa quıyldy. Onyń ishinde geologııalyq barlaýǵa 125,9 mlrd teńge jumsaldy. Mınıstrlik kómirsýtekter salasyndaǵy geologııalyq salany damytý úshin memlekettik qoldaý sharalaryn jetildirý jumystaryn júıeli túrde jalǵastyrady. Munda ár kezeńde jer qoınaýyn paıdalaný quqyǵyn berýdiń túsinikti jáne ashyq rásimderin qamtamasyz etý basty nazarda bolady, - dedi Erlan Aqkenjenov.