Bıyl jeńil ónerkásip salasynda 8 iri joba iske asyrylady
ASTANA. KAZINFORM — Qazaqstanda jeńil ónerkásip salasynda bıyl 8 iri ınvestıtsııalyq jobany iske asyrý josparlanyp otyr. Bul týraly QR Ónerkásip jáne qurylys mınıstrligi Ónerkásip komıteti tóraǵasynyń orynbasary Muhamed Andakov Ortalyq kommýnıkatsııalar qyzmetinde ótken baspasóz máslıhatynda málimdedi.
Onyń aıtýynsha, qazirgi tańda elde jeńil ónerkásip salasynda 1450 kásiporyn jumys isteıdi. Onyń ishinde 836 tigin, 489 toqyma buıymdaryn óndiretin, al 125 bylǵary jáne oǵan qatysty ónimder shyǵaratyn kásiporyn.
— Jeńil ónerkásipti damytýdyń negizgi baǵyty — ishki óńdeý úlesin arttyrý jáne ekonomıkanyń shıkizatqa táýeldiligin azaıtý. Bul mindet ınvestıtsııa tartý, jańa óndiristerdi iske qosý jáne júıeli qoldaý sharalaryn júzege asyrý arqyly kezeń-kezeńimen oryndalyp keledi, — dedi ol.
2025 jyly salada 600-den astam jumys orny ashylyp, 13 ınvestıtsııalyq joba iske asyryldy. Olardyń qatarynda Aqtóbe oblysyndaǵy jún óńdeý jobasy, Atyraý oblysynda toqylǵan polıpropılen geomatasyn óndiretin zaýyt jáne Túrkistan oblysyndaǵy maqta-toqyma kesheniniń birinshi kezeńi bar.
Bıyl iske asyrylatyn jobalar salanyń óndiristik áleýetin arttyrýǵa baǵyttalǵan. Atap aıtqanda, Shymkent qalasynda aralas jáne maqta matalaryn óndiretin zaýyt, Atyraý oblysynda ekstrýzııalyq polıpropılen geotorlaryn óndirý zaýytynyń úshinshi kezeńi jáne Túrkistan oblysynda maqta-toqyma kesheniniń ekinshi kezeńi iske qosylady.
Aıta keteıik, buǵan deıin Qazaqstanda jeńil ónerkásip salasyna shamamen 40 mlrd teńge ınvestıtsııa salynǵany habarlanǵan edi.
