Bıyl jemqorlardan tárkilengen aqshaǵa 25 mektep salynady — Úkimet
ASTANA. KAZINFORM — Elimizde jekemenshik mektepterdiń sany 667-ge jetti. Bul týraly Májilistiń jalpy otyrysynda Premer-Mınıstrdiń orynbasary Tamara Dúısenova málim etti.
«Atap aıtqanda, óńirlerde bilim berýdiń sapasyn kóterý, mektep salý, ınternetpen qamtamasyz etý jáne balalardyń qaýipsizdigi týraly máseleler jıi kóterildi. Bilim sapasyn kóterý máselesi qarastyrǵan Ulttyq baıandama daıarlanyp, mamandarmen jáne óńirlermen tolyq talqylandy. Oqý-aǵartý mınıstrliginiń aqparatyna sáıkes bul talqylaýlarǵa 200 myńnan asa muǵalim, joǵary jáne orta oqý oryndarynyń oqytýshylary qatysty. Osyǵan baılanysty ózgerister jaqynda ótken Úkimet otyrysynda qaralyp, bilim salasyn damytý Kontseptsııalaryna engizildi. Salada atqarylar jumystar óte aýqymdy, mınıstrler ózderiniń jaýaptarynda olarǵa keńinen toqtalady», — dedi T. Dúısenova.
Sonymen qatar ol bilim ınfraqurylymyn damytý baǵytyna toqtaldy.
«Osyǵan oraı apattyq jáne úsh aýysymdy mektepter máselesin joıý maqsatynda birneshe kózden mektep salý qolǵa alyndy. Onyń birinshisi — «Jaıly mektep» atty ulttyq jobasy, onyń aıasynda 369 mektep salynǵaly otyr. Ekinshisi — jemqorlyq qylmystar aıasynda tárkilenip, qaıtarylǵan qarajat esebinen byltyr 36 mektep salynsa, bıyl taǵy 25 mektep salynbaq. «Aýyl el besigi» baǵdarlamasy jáne jergilikti bıýdjetten 2023 jyly 7 mektep paıdalanýǵa berilse, bıyl taǵy 6 mektep salynbaq», — dedi vıtse-premer.
Onyń sózine qaraǵanda, belsendilik tanytyp kele jatqan qosymsha bir baǵyt — bul bıznes ınvestıtsııa. Byltyr 56 jekemenshik bilim oshaǵy iske qosyldy. Jalpy, mundaı jekemenshik mektepterdiń sany búginde 667-ge jetti. Onda 250 myńnan asa bala tálim alyp otyr.
«Jalpy, mektep salý úshin barlyq kózderden bólingen qarajattyń 2 jyldyq somasy 2,4 trln.teńgeni qurady. Sondaı-aq bıyl 270 mektep kúrdeli jóndeýden ótkiziledi», — dedi Tamara Dúısenova.
